Rusiyanın Saratov vilayətində Ukrayna Təhlükəsizlik Xidmətinin (SBU) Kiyevdəki “Oxmatdet” uşaq xəstəxanasına raket zərbəsinin təşkilində ittiham etdiyi general-mayor Nikolay Varpaxoviç olduğu bildirilən yüksək rütbəli hərbçiyə silahlı hücum edilib.
MSNews.az xəbər verir ki, hadisə sentyabrın 3-də Engels rayonunun Probujdeniye qəsəbəsində baş verib. Rusiya İstintaq Komitəsinin regional idarəsi hərbçiyə qarşı sui-qəsdin baş verdiyini təsdiqləyib, lakin yaralanan şəxsin adını və vəzifəsini açıqlamayıb. Hadisə ilə bağlı qəsdən adam öldürməyə cəhd və qanunsuz silah dövriyyəsi maddələri üzrə cinayət işi başlanıb.
Bu barədə “Kommersant” məlumat yayıb.
Rusiya və Ukrayna mediasının məlumatına görə, hücumun hədəfi Rusiya Silahlı Qüvvələrinin 22-ci ağır bombardmançı aviasiya diviziyasının komandiri, general-mayor Nikolay Varpaxoviç olub. Naməlum şəxs motosikletlə hərbçiyə yaxınlaşaraq iki dəfə atəş açıb. Güllələrdən birinin onun üzünə, digərinin isə bədən nahiyəsinə dəydiyi bildirilir. Hərbçinin sürücüsünün də yaralandığı barədə məlumat var. Varpaxoviçin ağır vəziyyətdə Moskvaya aparıldığı qeyd olunur. Bununla belə, Rusiya hüquq-mühafizə orqanları yaralanan şəxsin Varpaxoviç olduğunu hələ rəsmən təsdiqləməyib. “Euronews” da generalın hücumun hədəfi olduğunun açıq mənbələr və Rusiya hərbi kanalları tərəfindən bildirildiyini yazır.
Hücum Varpaxoviç barəsində Ukraynada yeni ittihamların irəli sürülməsindən cəmi bir neçə gün sonra baş verib. Avqustun 31-də Ukrayna Təhlükəsizlik Xidməti və Baş Prokurorluq general-mayora qiyabi şübhə elan edib.
SBU-nun rəsmi açıqlamasına görə, Ukrayna istintaqı Varpaxoviçin 8 iyul 2024-cü ildə Kiyevdəki “Oxmatdet” Milli Uşaq İxtisaslaşdırılmış Xəstəxanasına Kh-101 qanadlı raketi ilə zərbə endirilməsi barədə döyüş əmri verdiyini iddia edir. Həmin vaxt xəstəxanada 600-dən çox pasiyent olub, iki nəfər ölüb, onlarla insan yaralanıb. Ukrayna xüsusi xidməti Varpaxoviçə müharibə cinayətləri maddəsi üzrə qiyabi şübhə elan edib. “Ukrayna Təhlükəsizlik Xidməti”nin məlumatında bu ittihamlar istintaqın mövqeyi kimi təqdim olunur.
Varpaxoviç daha əvvəl Odessaya endirilən başqa bir raket zərbəsi ilə bağlı da Ukrayna hüquq-mühafizə orqanlarının istintaqında fiqurant olub. Ukrayna Milli Polisinin iyunun 3-də yaydığı məlumata görə, Varpaxoviç və polkovnik Oleq Skitski 23 aprel 2022-ci ildə Odessadakı “Tiras” yaşayış kompleksinə zərbənin hazırlanması və təşkilində ittiham olunurlar. Zərbə nəticəsində səkkiz mülki şəxs həlak olub. Bu ittiham da Ukrayna istintaqının mövqeyidir.
Hadisədən bir gün əvvəl – sentyabrın 2-də Sevastopolda “Mazda” markalı avtomobildə partlayış baş verib. Sürücü ağır yaralanaraq xəstəxanaya yerləşdirilib. İlkin məlumatlarda avtomobilin mühərrik hissəsinin altına əldəqayırma partlayıcı qurğunun yerləşdirildiyi bildirilirdi. Bununla belə, həmin şəxsin rusiyalı hərbçi olması rəsmi şəkildə təsdiqlənməyib.
Hazırda Varpaxoviçə hücumun arxasında kimin dayandığı məlum deyil. Ukrayna tərəfi sui-qəsdə görə məsuliyyəti üzərinə götürməyib və hücumun SBU ilə əlaqəli olduğuna dair açıq sübut təqdim edilməyib.
