Ermənistanın keçmiş prezidenti Robert Koçaryanın “Zvartnots” hava limanında ölkədən çıxışına icazə verilmədiyi barədə iddia hələlik rəsmi təsdiqini tapmayıb.
MSNews.az xəbər verir ki, erməni teleqram kanallarında Koçaryanın bir müddət əvvəl Yerevandakı “Zvartnots” beynəlxalq hava limanından Ermənistanı tərk etməyə çalışdığı, lakin hüquq-mühafizə orqanlarının buna imkan vermədiyi barədə məlumat yayılıb.
Lakin açıq mənbələrdə və Ermənistanın rəsmi qurumlarının açıqlamalarında bu iddianı təsdiqləyən məlumat yoxdur. “Interfax”, “OC Media” və “PanArmenian”ın yaydığı məlumatlarda isə oxşar hadisənin Ermənistanın “Çiçəklənən Ermənistan” partiyasının lideri Qaqik Tsarukyanla bağlı olduğu bildirilir.
Məlumatlara görə, Tsarukyan 9 iyunda “Zvartnots” hava limanından ölkəni tərk etməyə çalışıb, lakin buna icazə verilməyib. Daha sonra Ermənistan Baş Prokurorluğu onun barəsində xüsusilə külli miqdarda vergidən yayınma ittihamı ilə cinayət təqibinə başlandığını və ölkədən çıxışını məhdudlaşdıran tədbir seçildiyini açıqlayıb.
“Interfax” yazır ki, Tsarukyanın mətbuat katibi İveta Tonoyan bu səfərin əvvəlcədən planlaşdırılmış şəxsi və ailə xarakterli qısa səfər olduğunu bildirib.
Beləliklə, Robert Koçaryanla bağlı yayılan iddia hazırda təsdiqlənmiş fakt kimi təqdim edilə bilməz. Mövcud məlumatlara əsasən, “Zvartnots” hava limanında ölkədən çıxışa icazə verilməməsi barədə təsdiqlənmiş xəbərlər Koçaryanla deyil, Qaqik Tsarukyanla bağlıdır.
