“Qarabağ” heyətini braziliyalı mərkəz yarımmüdafiəçisi Dieqo Rosa ilə gücləndirib. Ağdam klubu 23 yaşlı futbolçunu Kiprin APOEL klubundan bir mövsümlük icarəyə götürüb.
MSNews.az xəbər verir ki, “Qarabağ”ın açıqlamasına əsasən, müqavilədə Rosanın icarə müddətinin sonunda birdəfəlik transferi üçün opsiya da nəzərdə tutulub. Futbolçu yeni komandasında 33 nömrəli forma ilə çıxış edəcək.
APOEL də transferi rəsmən təsdiqləyib. Kipr klubunun açıqlamasında bildirilir ki, “Qarabağ” gələn yay müəyyən şərtlər daxilində futbolçunu almaq hüququna malikdir. Əgər bu opsiyadan istifadə edilərsə, APOEL Rosanın hüquqlarının müəyyən faizini özündə saxlayacaq.
Dieqo Rosa ötən mövsüm APOEL-in heyətində bütün turnirlərdə 35 oyuna çıxıb, 3 qol vurub və 3 məhsuldar ötürmə edib. Statistik məlumatlar onun əsasən dayaq və mərkəz yarımmüdafiəçisi mövqelərində çıxış etdiyini göstərir.
Braziliyalı futbolçunun karyerasındakı ən diqqətçəkən məqamlardan biri onun 2019-cu ildə Braziliya U-17 millisinin heyətində dünya çempionu olmasıdır.
Rosa klub futboluna “Vitoriya” akademiyasında başlayıb, 2018-ci ildə isə “Qremio” sisteminə keçib. 2020-ci ildə “City Football Group” onun transferi üçün “Qremio”ya ilkin olaraq 6 milyon avro ödəməyə razılaşıb. Müqavilədə müxtəlif bonuslarla ümumi məbləğin 23,5-24 milyon avroya qədər yüksələ bilməsi nəzərdə tutulurdu.
2023-cü ildə Rosa Braziliyanın “Bahia” klubuna keçib, sonrakı dövrdə yenidən “Lommel”də və “İnternasional”da icarədə oynayıb. 2025-ci ilin avqustunda isə APOEL-ə transfer olunub. Onun Kipr klubu ilə müqaviləsinin 2028-ci ilin mayına qədər qüvvədə olduğu göstərilir.
Texniki keyfiyyətləri, ötürmə bacarığı və oyunun qurulmasında iştirakı ilə seçilən Rosa “Qarabağ”ın mərkəz yarımmüdafiəsində rəqabəti artıracaq. Onun həm dayaq, həm də daha irəli mövqedə oynaya bilməsi Qurban Qurbanova taktiki seçim imkanları verə bilər.
