Qana Prezidenti Con Dramani Mahama Qərbi Afrikada artan terror və ekstremizm təhdidinə qarşı ölkələrin birgə və qətiyyətli mövqe nümayiş etdirməsinin vacibliyini vurğulayıb.
Qana Xarici İşlər Nazirliyinin açıqlamasına görə, Mahama Qananın paytaxtı Akra şəhərində keçirilən Regional Əməkdaşlıq və Təhlükəsizlik üzrə Yüksək Səviyyəli Məşvərət Konfransında çıxış edib. Prezident bildirib ki, regionda təhlükəsizliyin təmin edilməsi yalnız kollektiv yanaşma ilə mümkündür.
Mahama terrorizm və ekstremizmin sərhəd tanımadığını, bu təhdidlərin Qərbi Afrikanın bütün ölkələrinə təsir göstərdiyini qeyd edib. O, Nigerin paytaxtı Niameydəki beynəlxalq hava limanına və ölkənin qərbində yerləşən bir kəndə edilən terror hücumlarını qınayaraq, mövcud regional təhlükəsizlik mexanizmlərinin gücləndirilməsinə və ölkələr arasında koordinasiyanın artırılmasına çağırıb.
Təhlükəsizlik risklərinin artıq milli sərhədləri aşaraq regional xarakter aldığını deyən Qana Prezidenti, daha geniş və əhatəli yanaşmanın zəruri olduğunu bildirib. Mahama Qərbi Afrikada altregional əməkdaşlığın yenidən qurulması və dərinləşdirilməsi, dayanıqlığın artırılması, etimadın bərpası və qeyri-sabitliyi qidalandıran struktur problemlərin həllinin vacibliyinə diqqət çəkib.
Prezident həmçinin səhiyyə xidmətləri, infrastruktur və iqtisadi inkişaf sahələrində atılacaq addımların sülhün möhkəmləndirilməsi və cəmiyyətlər arasında etimadın bərpasında mühüm rol oynadığını vurğulayıb.
Konfransda çıxış edən Syerra-Leone Prezidenti Culius Maada Bio tədbirin təşkilinə görə Mahamaya təşəkkür edib. Bio bildirib ki, terrorizm sosial müqavilələrin zəiflədiyi, yoxsulluğun və qeyri-təhlükəsizliyin geniş yayıldığı mühitlərdə daha da güclənir.
O, regionda təhlükəsizlik problemlərinin aradan qaldırılması üçün kəşfiyyat məlumatlarının paylaşımının artırılmasına və ölkələr arasında daha güclü əməkdaşlıq mexanizmlərinin qurulmasına çağırış edib.
