Polşada keçirilən küçə sorğusu zamanı gənclərdən birinin ukraynalıların ölkədən çıxarılmasını istədiyini bildirməsi sosial şəbəkələrdə müzakirələrə səbəb olub. Hadisə Polşa cəmiyyətində ukraynalı qaçqınlara münasibətin dəyişməsi fonunda diqqət çəkib.
MSNews.az xəbər verir ki, sosial şəbəkələrdə yayılan görüntülərdə jurnalist iki gəncə Polşada nəyi dəyişmək istədiklərini soruşur. Gənclərdən biri isə “Ukraynalıları qovardıq” cavabını verir.
Polşanın İctimai Rəyin Araşdırılması Mərkəzinin (CBOS) 2026-cı ilin iyulunda keçirdiyi sorğuya əsasən, respondentlərin 52 faizi Ukraynadan yeni qaçqınların qəbuluna qarşı çıxıb, 42 faizi isə bunu dəstəkləyib.
Bu barədə “Polskie Radio” məlumat yayıb.
Müqayisə üçün, 2022-ci ildə Rusiyanın Ukraynaya genişmiqyaslı müdaxiləsindən sonra Polşada ukraynalı qaçqınların qəbuluna dəstək 94 faizə çatmışdı. Sonrakı illərdə bu göstərici tədricən azalıb.
Bununla belə, yeni qaçqınların qəbuluna qarşı çıxmaqla ölkədə yaşayan bütün ukraynalıların çıxarılmasını tələb etmək fərqli mövqelərdir. Küçə müsahibəsində səsləndirilən fikir də Polşa gənclərinin ümumi mövqeyi kimi qiymətləndirilə bilməz.
