Macarıstanın Baş naziri Peter Madyar Avropa İttifaqının ölkəyə miqrasiya siyasəti ilə bağlı tətbiq etdiyi gündəlik 1 milyon avroluq cəriməni ədalətsiz adlandırıb.
MS-News.az xəbər verir ki, Madyar bu barədə avqustun 31-də Sloveniyada keçirilən Bled Strateji Forumunda danışaraq Macarıstanın Aİ-nin xarici sərhədlərini qoruduğu halda cərimələnməsini izah etməyin çətin olduğunu bildirib.
Bu barədə “Euronews” məlumat yayıb.
“Bizim məhkəmə qərarımız var, ümumi Avropa sərhədlərini qoruduğumuz üçün gündə 1 milyon avro ödəməliyik. Bu, ədalətli deyil və heç kim bu məsələni həll etməyə hazır görünmür”, – Madyar deyib. Baş nazir Brüsseli mübahisənin həlli üçün Budapeştlə razılıq əldə etməyə çağırıb.
Məhkəmənin qərarına görə, Viktor Orban hökuməti sığınacaq üçün müraciət prosedurlarına real çıxışı məhdudlaşdırıb, bəzi sığınacaq axtaran şəxslərin hüquqlarını pozub və qanunsuz yaşayan üçüncü ölkə vətəndaşlarının ölkədən çıxarılması zamanı Aİ qaydalarına əməl etməyib. Məhkəmə bunu ümumi Aİ sığınacaq siyasətinin tətbiqindən “qəsdən yayınma” və üzv dövlətlər arasında həmrəylik prinsipinin ciddi şəkildə pozulması kimi qiymətləndirib.
Peter Madyarın hökuməti 2026-cı ilin yazında Viktor Orbanın 16 illik hakimiyyətindən sonra vəzifəyə gəlib. Yeni baş nazir seçki kampaniyasında Aİ ilə münasibətləri normallaşdıracağını bildirsə də, qanunsuz miqrasiyaya qarşı sərt sərhəd siyasətini saxlamaqda qərarlıdır. O, daha əvvəl digər Aİ ölkələrinin həm ittifaq qanunlarına əməl edib, həm də qanunsuz miqrasiyanı məhdudlaşdıra bildiyini söyləyərək əvvəlki hökumətin yanaşmasını tənqid etmişdi.
Hazırda Budapeşt və Avropa Komissiyası cərimənin dayandırılması üçün hüquqi variantları müzakirə edir. “Euronews”un son məlumatına görə, tərəflər Orban dövründən qalan iki müvəqqəti miqrasiya qaydasının müddətinin uzadılmamasının problemin həllinə kömək edib-etməyəcəyini araşdırırlar. 2024-cü il qərarından sonra Macarıstanın cərimələr üzrə itirdiyi məbləğin artıq təxminən 910 milyon avroya çatdığı bildirilir.
Madyar sentyabrın 2-də Avropa Şurasının Prezidenti Antonio Koşta ilə görüşündə də gündəlik cərimənin tezliklə dayandırılmasını gözlədiyini bildirib. Bununla yanaşı, o, Macarıstanın qanunsuz miqrasiyanın qarşısını almaq üçün hüquqi tədbirləri və fiziki sərhəd maneələrini qoruyacağını vurğulayıb. Avropa Komissiyasının mövqeyinə görə isə cərimənin aradan qalxması üçün Macarıstan Aİ Ədalət Məhkəməsinin qərarına faktiki şəkildə əməl etməlidir. (euronews)
