Macarıstanın keçmiş baş naziri, Fidesz lideri Viktor Orban Peter Madyarın rəhbərlik etdiyi hökumətə qarşı siyasi mübarizənin yeni mərhələsinə keçdiklərini bəyan edərək “milli müqavimət” dövrünün başladığını bildirib.
MSNews.az xəbər verir ki, Orban bu fikirləri sentyabrın 12-də Kötcse kəndində keçirilən “Fidesz”-in ənənəvi qapalı siyasi toplantısında səsləndirib. Macarıstanın “Daily News Hungary” nəşrinin məlumatına görə, keçmiş hökumət başçısı yeni kabinetə təxminən 100 günlük “möhlət” verdiklərini, lakin bu mərhələnin artıq başa çatdığını bildirib.
Orban çıxışından daha sonra yayımladığı hissədə bildirib:
“Səbir dövrü başa çatıb. Əlcəklərimizi geyinirik və mübarizəyə başlayırıq”.
O, “Fidesz” tərəfdarlarına “milli müqavimətin vaxtının çatdığını” deyib və partiyanın müxalifətdə özünü yenidən quraraq hakimiyyətə qayıtmaq üçün çalışacağını vurğulayıb.
Orban Kötcsedəki çıxışında Madyar hökumətini Macarıstanın suverenliyini zəiflətməkdə və ölkəni “Brüsselin koloniyasına” çevirmək istəməkdə ittiham edib. “Index” yazır ki, keçmiş baş nazir Macarıstan iqtisadiyyatının xarici maraqlardan asılılığının artdığını iddia edib və yerli iqtisadi mövqelərin qorunmasını Fidesz-in əsas siyasi hədəflərindən biri kimi göstərib.
Kötcse toplantısı “Fidesz” üçün xüsusi əhəmiyyət daşıyır. “Telex” qeyd edir ki, partiya 16 ildən sonra ilk dəfə bu ənənəvi toplantını müxalifət statusunda keçirib. Orban seçki məğlubiyyətindən sonra parlament mandatından da imtina edib və diqqətini “Fidesz” və sağ siyasi düşərgənin yenidən təşkilinə yönəldib.
Peter Madyar isə eyni gün Vespremdə yeni ölkə turuna başlayaraq siyasi düşərgələr arasında qarşıdurmanın azaldılmasına çağırıb. O bildirib ki, hüquqi məsuliyyət və korrupsiya araşdırmaları davam etməli, lakin adi vətəndaşlar arasında siyasi düşmənçilik dərinləşdirilməməlidir.
