Almaniya kansleri Fridrix Merts yaxın həftə və ayların Avropanın təhlükəsizliyi və sülhün qorunması baxımından həlledici mərhələ olacağını bildirib. O, daxili siyasi təzyiqlərə baxmayaraq, Berlinin Ukrayna və Rusiya ilə bağlı mövcud siyasətindən “bir santimetr belə geri çəkilməyəcəyini” vurğulayıb.
MSNews.az xəbər verir ki, Merts bu fikirləri sentyabrın 14-də Finlandiyanın Rovaniemi şəhərində keçirilən Avropa Arktika Sammitində səsləndirib. “Reuters” yazır ki, kansler Avropanın müdafiəsinin qarşıdakı həftə və aylarda həlledici mərhələyə daxil olduğunu bildirib.
Merts Avropanın şimalındakı vəziyyətə diqqət çəkərək burada qitədə sülhün nə qədər kövrək olduğunun aydın göründüyünü deyib. Almaniya hökumətinin rəsmi məlumatına əsasən, kansler Avropa və NATO ölkələrini azadlığın müdafiəsi və sülhün qorunması üçün zəruri addımları atmağa çağırıb.
“Bir santimetr belə geri çəkilməyəcəyəm”, — Merts Almaniyanın mövcud xarici və təhlükəsizlik siyasəti barədə danışarkən bildirib.
“Reuters” qeyd edir ki, kanslerin bu açıqlaması Almaniyada onun siyasətinə, o cümlədən Ukraynaya dəstəyə dair daxili mübahisələrin gücləndiyi bir vaxtda səslənib. Merts Rusiyanın Ukraynada üstünlük əldə etməsinin Almaniya da daxil olmaqla Avropa üçün ciddi nəticələr doğura biləcəyini bildirib.
Rovaniemi sammitinin gündəliyində yalnız Ukrayna müharibəsi deyil, Arktikanın artan strateji əhəmiyyəti də əsas yer tutub. Almaniya hökumətinin məlumatına görə, iştirakçılar Rusiyanın regiondakı mövcudluğunu, hibrid təhdidləri, kritik xammal və enerji ehtiyatlarını, yeni nəqliyyat və gəmiçilik marşrutlarını, eləcə də iqlim dəyişikliyinin yaratdığı geosiyasi nəticələri müzakirə ediblər.
“Associated Press” bildirir ki, Arktikada buzların əriməsi yeni gəmiçilik yollarını daha əlçatan edir, təbii ehtiyatlar uğrunda rəqabəti artırır və Çinin regiondakı iqtisadi maraqlarını genişləndirir. Eyni zamanda Rusiyanın hərbi fəallığı Avropa ölkələrinin təhlükəsizlik narahatlıqlarını gücləndirir.
Sammitdən sonra 12 Avropa İttifaqı ölkəsi Arktikada Aİ-nin daha fəal və strateji rol oynamasına çağıran birgə bəyanat yayıb. Almaniya, Fransa, Finlandiya, Danimarka, İsveç və digər ölkələr regionda sabitlik və Avropanın maraqlarının qorunması üçün daha çox resurs ayrılmasını istəyiblər.
