Böyük Britaniyada müsəlmanlara qarşı dini nifrət zəminində qeydə alınan cinayətlərin sayı bir il ərzində 15% artıb. 2026-cı ilin martında başa çatan dövrdə İngiltərə və Uels polisi bu kateqoriya üzrə 5 132 fakt qeydə alıb.
MSNews.az xəbər verir ki, Böyük Britaniya Daxili İşlər Nazirliyinin rəsmi statistikasına əsasən, əvvəlki illə müqayisədə müsəlmanlara qarşı dini nifrət cinayətlərinin sayı 4479-dan 5132-yə yüksəlib. Bu, 15 faizlik artıma bərabərdir.
Ümumilikdə İngiltərə və Uelsdə 2025-ci ilin aprelindən 2026-cı ilin martınadək 146825 nifrət cinayəti qeydə alınıb. Bu göstərici bir il əvvəllə müqayisədə 7% çoxdur. Eyni dövrdə irqi nifrət cinayətləri 9%, dini nifrət cinayətləri isə 13% artıb.
Dini nifrət cinayətlərinin ümumi sayı 11419 olub. Onların 46%-i müsəlmanlara, 28%-i isə yəhudilərə qarşı yönəlib. Yəhudilərə qarşı dini nifrət cinayətləri də 10% artaraq 3 162-yə çatıb.
London Metropolitan Polisinin məlumatları uzunmüddətli müqayisədən çıxarıldıqda, dini nifrət cinayətlərinin sayı 8 214 olub. Daxili İşlər Nazirliyi bunun 2012-ci ildən bu yana qeydə alınan ən yüksək illik göstərici olduğunu bildirir.
Rəsmi hesabatda müsəlmanlara qarşı cinayətlərin 2025-ci ilin sentyabrında və 2026-cı ilin martında nəzərəçarpacaq dərəcədə artdığı qeyd olunur. Sentyabrdakı yüksəliş bir sıra etiraz aksiyaları və ictimai asayiş insidentləri ilə, martdakı yüksəliş isə 28 fevralda başlayan ABŞ–İran münaqişəsi ilə üst-üstə düşüb.
Daxili İşlər Nazirliyi eyni zamanda xəbərdarlıq edir ki, polis statistikası nifrət cinayətlərinin real yayılmasını tam ölçmür. Bütün hadisələr polisə bildirilmir və qeydiyyat sistemlərindəki dəyişikliklər illər üzrə birbaşa müqayisələri çətinləşdirə bilər.
