Mərakeşli qadın futbolçu Faten Ben Ömər əl-Əzizi İspaniyanın idarə etdiyi Seuta şəhərinə üzərək çatmağa çalışarkən həyatını itirib.
MSNews.az xəbər verir ki, “Əl-Cəzirə” futbolçunun dəniz yolu ilə Seutaya keçmək cəhdi zamanı öldüyünü bildirib. O, karyerası ərzində “Məğrib Tetuán” və “Məğrib Atletik Tancer” qadın komandalarının formasını geyinib.
“El Pueblo de Ceuta” yazır ki, futbolçunun ölümü Mərakeş idman ictimaiyyətində böyük kədər yaradıb. Mərakeş Peşəkar Futbolçular Assosiasiyası onun ailəsinə, yaxınlarına və keçmiş komanda yoldaşlarına başsağlığı verib.
Futbolçunun dəqiq yaşı ilə bağlı açıq mənbələrdə fərqli məlumatlar mövcuddur. Bəzi media paylaşımlarında onun 20 yaşında olduğu göstərilsə də, klubun və ya rəsmi qurumların yayımladığı açıqlamalarda yaşı dəqiqləşdirilməyib.
“Mundo Deportivo” “Məğrib Atletik Tetuán”ın vida açıqlamasına istinadən futbolçunun daha yaxşı həyat və gələcək ümidi ilə Seutaya çatmağa çalışdığını yazıb. Klub gənclərin təhlükəli miqrasiya yollarında həyatlarını itirməsindən dərin təəssüf keçirdiyini bildirib.
Hadisə Mərakeşdən Seutaya kütləvi keçid cəhdlərinin artdığı dövrdə baş verib. Yerli mənbələr son günlərdə təhlükəli dəniz marşrutunda çoxsaylı insanların öldüyünü və itkin düşdüyünü bildirirlər. Ölümün məhz dəniz axınının futbolçunu aparması nəticəsində baş verdiyi barədə ayrıca rəsmi məlumat açıqlanmayıb.
