Benin millisinin baş məşqçisi Gernot Ror Lionel Messinin Argentina yığmasında keçirdiyi son oyundan sonra təşkilati məsələlərlə bağlı narazılığını bildirib. Onun sözlərinə görə, Benin futbolçuları Messi ilə şəkil çəkdirə və argentinalı oyunçularla forma dəyişə bilməyiblər.
MSNews.az xəbər verir ki, Ror RMC radiosunun “Rothen s’enflamme” proqramında bildirib ki, komandasının oyunçuları matçdan sonra xatirə əldə etməyə çalışsalar da, buna nail ola bilməyiblər.
Baş məşqçi deyib:
“Argentinalılar oyunçularımıza heç nə vermədilər. Messi ilə heç bir şəklimiz yoxdur. Forma dəyişmək istəyirdik, amma bir dənə də forma ala bilmədik.”
Rorun sözlərinə görə, təhlükəsizlik əməkdaşları Benin nümayəndələrinin Argentina millisinin paltardəyişmə otağına aparan dəhlizə daxil olmasına imkan verməyiblər. O bildirib ki, bəzi futbolçular öz formalarını gətirərək argentinalı oyunçularla dəyişmək istəyiblər, lakin bütün cəhdlər nəticəsiz qalıb.
Bununla belə, Ror gecədən tamamilə suvenir olmadan ayrılmayıb. O, 2018-ci il dünya çempionatından qalan Messi formasını Argentina millisinin baş məşqçisi Lionel Skaloniyə verib. Skaloni formanı Messiyə imzalatdıraraq Rora qaytarıb.
Ror eyni zamanda matçın Benin futbolçuları, xüsusilə gənc oyunçular üçün böyük təcrübə olduğunu da vurğulayıb. O, “Monumental” stadionunda Messinin vida matçında oynamağı “xüsusi macəra” adlandırıb.
Argentina görüşdə Benini 3:0 hesabı ilə məğlub edib. Messi milli komandadakı son oyununda bir qol vurub və iki məhsuldar ötürmə edib.
