ABŞ Prezidenti Donald Tramp Ağ Evdə keçirilən tədbirdə uşaqlarla söhbəti zamanı voleybol oynayan qıza boyu ilə bağlı sual verməsi və daha sonra İranla bağlı sərt açıqlamaları ilə gündəmə gəlib. Tədbir Trampın məktəblərdə Prezident Fiziki Hazırlıq Mükafatının bərpası ilə bağlı təşəbbüsü çərçivəsində təşkil olunub.
“Associated Press” yazır ki, mərasimdə uşaqlar, peşəkar idmançılar və administrasiya rəsmiləri iştirak ediblər.
Tədbir zamanı uşaqlardan biri voleybol oynadığını və yayda futbola başlamaq istədiyini bildirib. Tramp isə qıza müraciətlə onun boyu ilə voleybolda topa zərbə endirib-endirə bilmədiyini, yüksək tullandığını soruşub. Qız “çox yox” cavabı verdikdən sonra Tramp futbolun onun üçün daha uyğun ola biləcəyini deyib. Bu dialoq sosial şəbəkələrdə geniş müzakirə olunub.
Mərasimdə Trampın mövzudan yayınaraq İranla bağlı danışması da diqqət çəkib. “People” nəşrinin məlumatına görə, Prezident ABŞ və İsrailin İrana qarşı hərbi əməliyyatlarını müdafiə edib və ABŞ müdaxilə etməsəydi, “bəlkə də hamımız burada olmazdıq” ifadəsini işlədib. “Roll Call”-un yayımladığı çıxış stenoqramında da Trampın İranın nüvə silahına sahib olacağı halda Yaxın Şərqin, İsrailin və daha sonra Avropanın hədəfə alınacağını dediyi göstərilir.
Ağ Evdəki tədbirin əsas məqsədi uşaqlar arasında idmana və fiziki aktivliyə marağı artırmaq idi. Tramp bildirib ki, administrasiyası “rəqabət və mükəmməllik dəyərlərini” gənc nəslə ötürmək istəyir. Lakin tədbir zamanı səslənən siyasi və hərbi mövzulu açıqlamalar mərasimin idman gündəmini kölgədə qoyub.
