Malidə aprelin 25-də başlayan genişmiqyaslı hücumlar ikinci gün də ölkədə ciddi təhlükəsizlik böhranı yaradıb. “Əl-Qaidə” ilə əlaqəli “Camaat Nüsrət əl-İslam vəl-Müslimin” — JNIM və Tuareq əsaslı “Azavadın Azadlığı Cəbhəsi” — FLA Bamako, Kati, Qao, Kidal, Mopti və Sevare istiqamətlərində koordinasiyalı hücumlar həyata keçirib.
“Reuters”-in məlumatına görə, JNIM və FLA hücumlara görə birgə məsuliyyəti üzərlərinə götürüblər.
Ən diqqətçəkən hadisələrdən biri Kidalda baş verib. “Associated Press”-in məlumatına görə, FLA sözçüsü Məhəmməd əl-Maulud Ramadan Rusiyanın “Afrika Korpusu”nun qüvvələrinin və Mali ordusunun Kidaldan “sülh yolu ilə çıxış” razılaşmasından sonra geri çəkildiyini bildirib. Mali Silahlı Qüvvələrinin rəhbəri general Oumar Diarra da dövlət televiziyasında ordunun Kidalı tərk etdiyini və qüvvələrin şəhərdən təxminən 100 kilometr cənubda yerləşən Anefisə yerləşdirildiyini təsdiqləyib.
FLA Kidali “azad” elan edib və Rusiyanı Mali hərbi xuntasına dəstəyini yenidən nəzərdən keçirməyə çağırıb. Bu şəhər 2023-cü ildə Mali ordusu və rusiyalı hərbi müttəfiqlər tərəfindən ələ keçirilmişdi və həmin vaxt bu, Bamako üçün simvolik qələbə sayılırdı. Buna görə Kidalın itirilməsi Mali hakimiyyəti və onun Rusiya ilə təhlükəsizlik əməkdaşlığı üçün ciddi zərbə kimi qiymətləndirilir.
Hücumlar zamanı Mali müdafiə naziri Sadio Kamaranın da öldürüldüyü rəsmən açıqlanıb. Onun Kati hərbi bazası yaxınlığındakı iqamətgahı kamikadzenin idarə etdiyi partlayıcı yüklü avtomobil və silahlı şəxslər tərəfindən hədəfə alınıb. Mali hökuməti əvvəlcə ümumi itkilərlə bağlı dəqiq rəqəm açıqlamasa da, azı 16 nəfərin yaralandığını bildirib.
Sosial şəbəkələrdə FLA və JNIM döyüşçülərinin Kidaldakı hərbi obyektlərdə hərəkət etdiyini göstərdiyi iddia olunan videolar yayılıb. Lakin “silahların bir hissəsinin təhvil verilməsi”, “yalnız rus qüvvələri üçün yaşıl dəhliz ayrılması” və “Afrika Korpusunun itkilərdən sonra razılaşma ilə çıxması” kimi detallar hələlik Mali, Rusiya və ya beynəlxalq agentliklər tərəfindən tam təsdiqlənməyib. Hazırda etibarlı mənbələrlə təsdiqlənən əsas fakt budur ki, Kidalda Mali ordusu və Rusiya ilə əlaqəli qüvvələr geri çəkilib, şəhərin nəzarəti isə FLA tərəfindən elan olunub.
Ekspertlər bu hücumları 2012-ci ildən bəri Malidə ən ciddi təhlükəsizlik eskalasiyalarından biri kimi qiymətləndirirlər. JNIM və FLA-nın bu miqyasda koordinasiyalı hərəkəti Mali hərbi hökuməti üçün yeni mərhələdir və ölkənin Rusiya dəstəyinə baxmayaraq təhlükəsizliyi bərpa etməkdə çətinlik çəkdiyini göstərir.
