Venesuela prezidenti Nikolas Maduronun ABŞ qüvvələri tərəfindən ələ keçirilməsindən sonra ölkədə genişmiqyaslı araşdırmalar aparılır və bu prosesdə Maduroya ən yaxın çevrədən xəyanət edən şəxsin adı önə çıxıb.
Məlumatlara görə, Venesuela ordusunun kəşfiyyat şefi, eyni zamanda prezidentin yaxın qoruma heyətinin rəhbəri olan general Xavier Markano Tabata, ABŞ-ın xüsusi əməliyyatına zəmin hazırladığı iddiası ilə ittiham olunaraq həbs edilib. Onun hava hücumundan müdafiə protokollarını pozduğu və koordinatları açdığı iddia edilir ki, bu da əməliyyatın uğurla həyata keçirilməsini mümkün edib.
Bu dəyişiklikdən sonra Tabata vəzifəsindən azad edilib və onun yerinə, əvvəllər müxalifətə qarşı sərt davranışlara görə sanksiyalara məruz qalmış general Qustavo E. Qonzales López gətirilib.
Əməliyyat zamanı 75-dən çox əsgərin, o cümlədən Tabatanın komandasına daxil olan şəxslərin həlak olduğu bildirilir.
Eyni zamanda, Venesuela Milli Məclisi Delsi Rodrigezi müvəqqəti dövlət başçısı olaraq təsdiqləyib.
ABŞ prezidenti Donald Tramp ələ keçirmə əməliyyatının ardından keçirilən mətbuat toplantısında bildirib ki, Venesuela bundan sonra ABŞ-ın liderliyi altında idarə olunacaq. Əlavə olaraq, o, yeni rəhbərdən neft təminatı ilə bağlı ABŞ tələblərinə uyğun hərəkət etməsini gözlədiyini vurğulayıb.
