Venesuelada müxalifətin əsas lideri Maria Korina Maçado ABŞ Prezidenti Donald Trampın Nikolas Maduronu devirməsini yüksək qiymətləndirərək, tezliklə ölkəsinə qayıdacağını və azad seçkilərin keçirilməsini tələb etdiyini bildirib.
58 yaşlı hüquqşünas və üç uşaq anası olan Maçado oktyabr ayında gizli şəkildə Venesuelanı tərk etdikdən sonra ilk dəfə açıqlama verib və ABŞ-ın atdığı addımları “ədalətin tiraniyaya qalib gəldiyi tarixi an” kimi xarakterizə edib.
Maçado bildirib ki, mümkün qədər tez Venesuelaya dönməyi planlaşdırır və müxalifət hərəkatı azad və ədalətli seçkilərdə qələbəyə hazırdır. Onun sözlərinə görə, müxalifət 2024-cü ildə saxtakarlıq şəraitində keçirilən seçkilərdə böyük fərqlə qalib gəlib və real demokratik seçkilər olarsa, səslərin 90 faizindən çoxunu qazana bilərlər. O, “Fox News”-a müsahibəsində Venesueladakı siyasi keçidin irəliləməli olduğunu vurğulayıb.
Bununla belə, Tramp administrasiyasının mövqeyi müxalifət daxilində məyusluq yaradıb. ABŞ Prezidenti Donald Tramp bildirib ki, ölkədə vəziyyət köklü şəkildə dəyişmədən seçki keçirmək mümkün deyil və 30 günlük seçki təqvimi real görünmür. ABŞ administrasiyasının hələlik Maduronun müttəfiqi olan müvəqqəti prezident Delsi Rodrigeslə işləməyə üstünlük verdiyi bildirilir. Maçado isə Rodrigesi korrupsiya, təqib, işgəncə və narkotik qaçaqmalçılığı ilə ittiham edərək, onun Rusiya, Çin və İranla yaxın əlaqələrinə diqqət çəkib və beynəlxalq investorlar üçün etibarlı fiqur olmadığını bildirib.
Maçado Trampa açıq şəkildə təşəkkür edərək, Nobel Sülh Mükafatını şəxsən ona təqdim edəcəyini söyləyib. Onun sözlərinə görə, ABŞ-ın yanvarın 3-də həyata keçirdiyi əməliyyat Venesuelada demokratik keçidə doğru böyük addım olub. O, Venesuelanın dünyanın ən böyük neft ehtiyatlarına sahib olduğunu xatırladaraq, hüququn aliliyinin bərpa ediləcəyi təqdirdə ölkənin Amerika qitəsinin enerji mərkəzinə çevrilə biləcəyini və xarici investisiyalar üçün təhlükəsiz mühit yaradılacağını qeyd edib.
Hazırda Venesuelada vəziyyət gərgin olaraq qalır. Maduronun ABŞ tərəfindən saxlanılmasından sonra Karakasda təhlükəsizlik tədbirləri gücləndirilib, hadisələri işıqlandıran 14 media əməkdaşı qısa müddətə saxlanılıb. “Reuters” tərəfindən təsdiqlənmiş görüntülərdə gecə saatlarında Karakas səmasında atəş açıldığı görünür. Rəsmilər bunun icazəsiz dronların qarşısını almaq məqsədi daşıdığını bildiriblər.
Bu arada, ABŞ-da məhkəmə qarşısına çıxarılan 63 yaşlı Nikolas Maduro narkotiklə bağlı ittihamları qəbul etməyib və özünü hələ də Venesuelanın qanuni prezidenti adlandırıb. O və həyat yoldaşı Siliya Flores narkoterrorizm, kokain qaçaqmalçılığı və ağır silahların saxlanılması kimi ittihamlarla üzləşir və növbəti məhkəmə iclasının martın 17-də keçirilməsi planlaşdırılır. ABŞ-ın bu addımı Rusiya, Çin və Venesuelanın solçu müttəfiqləri tərəfindən sərt tənqid olunub, beynəlxalq hüquqa uyğunluğu isə mübahisə mövzusu olaraq qalır.
