İtaliyanın Baş naziri Corcia Meloni məktəblərdə burqa və niqabın qadağan edilməsini, həmçinin hər sinifdə xarici şagirdlərin sayına qanunla yuxarı hədd qoyulmasını nəzərdə tutan tədbirlər paketini açıqlayıb. Təkliflərin yaxın vaxtlarda Nazirlər Şurasının müzakirəsinə çıxarılması planlaşdırılır.
MSNews.az xəbər verir ki, Meloni bu barədə sentyabrın 20-də Romada rəhbərlik etdiyi “İtaliya Qardaşları” partiyasının gənclər qanadının təşkil etdiyi “Fenix” tədbirində çıxış edib.
Bu barədə “Reuters” agentliyi məlumat yayıb.
Baş nazir bildirib ki, yeni qaydalar siniflərdə xarici şagirdlərin maksimum sayını müəyyən etməklə yanaşı, məktəbə uyğunlaşmaqda ciddi çətinlik çəkən xarici şagirdlərin valideynləri üçün italyan dilinin öyrənilməsini də məcburi edəcək. Bununla belə, bir sinifdə neçə xarici şagirdin təhsil ala biləcəyinə dair konkret rəqəm hələ açıqlanmayıb.
Meloni təklifi izah edərkən italyan dilini bilməyən şagirdlərin sayının çox olmasının onların təhsil mühitinə uyğunlaşmasını çətinləşdirə biləcəyini söyləyib. O, italyan uşaqlarının öz siniflərində azlıqda qalaraq kənarda hiss etməsinin qəbuledilməz olduğunu bildirib.
Tədbirlər paketinin digər hissəsi məktəblərdə üzü örtən burqa və niqabın qadağan olunmasını nəzərdə tutur. Açıqlanan təklif adi hicaba deyil, üzü örtən geyimlərə aiddir.
“Məktəbə üzü açıq getmək lazımdır. İtaliyada heç kim həqiqi və ya ehtimal olunan ənənə adına gənc qadının üzünü gizlətməsinə qərar verə bilməz”, – deyən Meloni qadın və kişi bərabərliyinin müzakirə predmeti olmadığını vurğulayıb. Bu barədə “Sky TG24” məlumat yayıb.
Təkliflər hələ qüvvəyə minməyib və onların tətbiq qaydaları tam açıqlanmayıb. İtaliyada məktəb direktorlarının nümayəndələri xarici şagirdlər üçün say həddinin tətbiqinin, xüsusilə miqrant ailələrin sıx yaşadığı ərazilərdə uşaqların evlərinə yaxın məktəbdə təhsil alması baxımından çətinlik yarada biləcəyini bildiriblər.
