İran İslam İnqilabı Keşikçiləri Korpusundakı (SEPAH) mənbə Əli-Taher silsiləsindəki tunellərdə 70-dən 100-dək “Hizbullah” döyüşçüsünün, həmçinin İranın “Qüds Qüvvələri”ndən olan müşavirlərin İsrail qüvvələrinin mühasirəsində qaldığını bildirib.
MSNews.az xəbər verir ki, məlumatı “The New York Times” yayıb.
Nəşrin məlumatına görə, İsrailin bölgədəki əməliyyatı iyunda başlayıb. SEPAH rəsmisi İsrail qüvvələrinin tunel kompleksini mühasirəyə almasından sonra onlarla “Hizbullah” üzvünün və iranlı müşavirin yeraltında qaldığını deyib. Mənbənin sözlərinə görə, tunellərdə raketlər, PUA-lar və digər mühüm silahlar saxlanılıb, əsas komanda mərkəzlərindən biri də burada yerləşib.
Eyni mənbə “Hizbullah”ın bir neçə gün ərzində PUA-lar vasitəsilə tunellərdə qalan şəxslərə su və ərzaq çatdırmağa çalışdığını bildirib. Onun iddiasına görə, döyüşçülər gətirilən yükü götürmək üçün tuneldən çıxdıqda İsrail qüvvələri tərəfindən hədəfə alınıblar.
SEPAH rəsmisi tunel kompleksinin üç çıxışının olduğunu, onlardan ikisinin İsrail ordusunun nəzarətinə keçdiyini, üçüncüsünün isə bağlanmaq təhlükəsi ilə üzləşdiyini bildirib. Onun sözlərinə görə, Tehran və “Hizbullah” üçün prioritet ərazidəki silahları çıxarmaq və döyüşçüləri xilas etmək olub, lakin bunun mümkünlüyü getdikcə azalıb.
Bununla belə, 70-100 nəfərlik rəqəm və iranlı müşavirlərin tunellərdə olması anonim SEPAH mənbəsinin məlumatıdır. “Hizbullah” bu iddialara dərhal münasibət bildirməyib. “Reuters” isə ərazidəki vəziyyəti müstəqil şəkildə təsdiqləyə bilmədiyini yazıb.
İsrail ordusu sentyabrın 3-də Əli-Taher silsiləsində iki yeraltı marşrut üzərində əməliyyat nəzarəti əldə etdiyini və tunelləri “Hizbullah” döyüşçülərindən təmizlədiyini açıqlayıb. İsrail Müdafiə Qüvvələri bildirib ki, əməliyyat zamanı döyüşçülərin bir qismi öldürülüb, digərləri isə ərazidən qaçıb.
İsrail ordusunun məlumatına görə, tunellərdə komanda məntəqələri, silah otaqları, generator bölmələri, yaşayış yerləri, duşlar və mətbəx aşkarlanıb. SAXAL kompleksin təxminən iki onillik ərzində İranın maliyyəsi və planlaşdırması ilə qurulduğunu iddia edir. Hazırda yeraltı infrastrukturun zərərsizləşdirilməsi üzrə işlərin davam etdiyi bildirilir.
