İsrail, iki ildən sonra açılan Refah Sərhəd Keçidindən yalnız 12 fələstinlinin Qəzza Zolağına dönüşünə icazə verib.
2024-cü ilin mayından bəri qapalı olan Misir sərhədindəki keçid vasitəsilə 9 qadın və 3 uşaq olmaqla ümumilikdə 12 nəfər Birləşmiş Millətlərə məxsus vasitələrin müşayiəti ilə Xan Yunusdakı Nasir Xəstəxanasına çatdırılıb.
Fələstinlilər, sərhəddə İsrail hərbçiləri tərəfindən zorakı davranışa məruz qaldıqlarını, əşyalarına və uşaqlarının oyuncaqlarına əl qoyulduğunu bildiriblər. Sağlamlıq mənbələri, Qəzzaya çatan şəxslərin hamısının Misir xəstəxanalarında müalicə alan xəstələr və müşahidəçilər olduğunu açıqlayıb.
İsrail və Misir mediasının məlumatına görə, Qəzzaya keçməsi planlanan 50 nəfərdən yalnız 12-si geri dönə bilib. Refah Sərhəd Keçidi gündəlik 50 nəfərinQəzzaya və 50 nəfərin Misirə keçməsi üçün planlaşdırılsa da, İsrail və Qahirə arasında razılıq əldə olunmayıb.
Qəzza Sağlamlıq Nazirliyinə görə, bölgədəki 18 minə yaxın xəstə, o cümlədən 4 mindən çox uşaq, müalicə imkanlarının məhdudluğu səbəbilə yardım gözləyir. Ümumdünya Sağlamlıq Təşkilatı (ÜST) 2025-ci ilin martından bəri ilk dəfə Refah üzərindən tibb təxliyəsini dəstəkləyib. ÜST, Qəzza daxilində davamlı və dayanıqlı səhiyyə sisteminin yaradılmasının vacibliyini vurğulayıb və tibb təxliyələrinə çıxışın təmin edilməsini tələb edib.
