İranda ABŞ ilə mümkün anlaşma və regional gərginliyin azaldılması fonunda hakimiyyət daxilində fikir ayrılıqlarının dərinləşdiyi bildirilir. Son günlər yayılan məlumatlar göstərir ki, Tehran rəhbərliyində diplomatik xətti dəstəkləyən dairələrlə sərt xətt tərəfdarları arasında qarşıdurma açıq mərhələyə keçib. Lakin qeyd edilməlidir ki, bu iddiaların bir hissəsi rəsmi şəkildə təsdiqlənməyib və əsasən media sızmaları, regional mənbələr və analitik şərhlərə əsaslanır.
İran parlamentinin sədri Məhəmməd Baqir Qalibaf və xarici işlər naziri Abbas Araqçinin Vaşinqtonla gərginliyin yumşaldılmasına daha açıq yanaşdığı iddia olunur.
“bne IntelliNews” yazır ki, Qalibaf ABŞ-la təmaslarda aparıcı fiqurlardan biri kimi təqdim edilir və hökumət daxilində daha praqmatik xəttin siması hesab olunur.
Bunun fonunda Hörmüz boğazı ətrafında ziddiyyətli siqnallar diqqət çəkib. Abbas Araqçi boğazın kommersiya gəmiləri üçün açıq olduğunu bəyan etsə də, qısa müddət sonra İran İnqilab Keşikçiləri Korpusunun (SEPAH) dəniz qüvvələrinin sərt məhdudiyyətlər tətbiq etdiyi və bəzi gəmilərə xəbərdarlıq atəşi açıldığı barədə məlumatlar yayılıb.
İran daxilində bu ziddiyyətlər “son qərarı kimin verdiyi” sualını yenidən gündəmə gətirib. “Euronews”-un təhlilində qeyd olunur ki, SEPAH-ın praktiki gücü hökumətin diplomatik xəttini üstələyə bilər və bu, Tehranın vahid qərarvermə mərkəzi ilə bağlı suallar yaradır.
Ekspertlərin fikrincə, əgər praqmatik qanad zəifləsə, İranın ABŞ-la danışıqlardan uzaqlaşması və regionda daha sərt qarşıdurma xəttinə keçməsi mümkündür. Əks halda, iqtisadi təzyiqlərin azaldılması üçün diplomatik pəncərə açıla bilər.
