İran xarici işlər nazirinin hüquqi və beynəlxalq məsələlər üzrə müavini Kazım Qəribabadi Hörmüz boğazına yaxınlaşacaq Avropa hərbi gəmələrinin İran üçün “qanuni hədəf” sayılacağını bildirib.
MSNews.az xəbər verir ki, Qəribabadinin açıqlamasını İranın “Fars” agentliyi yayıb.
“Avropanın Hörmüz boğazına yaxınlaşmaq istəyən istənilən hərbi gəmisi bizim üçün qanuni hədəfdir”, – deyə İran rəsmisi bildirib.
Qəribabadinin açıqlamasında söhbət bütün Avropa ticarət və mülki gəmilərindən deyil, boğaza mümkün hərbi missiya çərçivəsində göndərilə biləcək Avropa döyüş gəmilərindən gedir. Bu səbəbdən bəyanatın “Avropaya məxsus bütün gəmilər hədəf elan edildi” kimi təqdim olunması düzgün olmaz.
İran rəsmisinin sözlərinə görə, Hörmüz boğazı artıq ölkənin milli təhlükəsizlik strategiyasının əsas elementlərindən birinə çevrilib və Tehran bu ərazidə müharibədən əvvəl mövcud olmuş gəmiçilik rejiminə qayıtmaq niyyətində deyil.
“Hörmüz boğazındakı vəziyyət əvvəlki halına qayıdarsa, müharibədəki uğurumuz tam olmayacaq”, – deyə Qəribabadi qeyd edib.
O, boğazın gələcək idarəçilik mexanizminin İranın təhlükəsizliyinə uzunmüddətli təsir göstərəcəyini və Tehranın burada əldə etdiyi mövqedən geri çəkilməyəcəyini vurğulayıb.
“Reuters” yazır ki, Oman daha əvvəl Körfəz dövlətlərinin dəstəklədiyi planı İrana təqdim edib. Təklif Hörmüz boğazından kommersiya gəmilərinin təhlükəsiz keçidini və könüllü ödəniş mexanizminin yaradılmasını nəzərdə tutur. Tehran isə boğazın əvvəlki qaydada sərbəst gəmiçiliyə açılmasına qarşı çıxır.
“The Wall Street Journal” İranın Omanın boğazın birgə idarə olunması ilə bağlı təklifini qəbul etmədiyini və strateji su yolunda daha geniş nəzarət tələb etdiyini bildirib.
Qəribabadinin bəyanatı ABŞ-nin rəhbərliyi ilə Hörmüz boğazında beynəlxalq patrul missiyasının yaradılması və Böyük Britaniya ilə Fransanın mümkün iştirakı barədə müzakirələrin aparıldığı vaxt səsləndirilib.
Hazırda Avropa ölkələrinin Hörmüz boğazına hərbi gəmilər göndərməsi barədə yekun qərar açıqlanmayıb. İran rəsmisinin təhdidinə Avropa İttifaqı, Böyük Britaniya və Fransa tərəfindən rəsmi cavab verildiyi barədə də məlumat yoxdur.
