FIFA prezidenti Canni İnfantinonun Dünya çempionatının kommersiya hüquqlarını idarə edəcək yeni quruma rəhbərlik etməsi halında illik baza maaşının 30 milyon dollara, yəni təxminən 26 milyon avroya yüksələ biləcəyi iddia olunub.
MSNews.az xəbər verir ki, “The Times” layihədən məlumatlı mənbələrə istinadən İnfantinonun FIFA prezidenti postundan ayrıldıqdan sonra “FIFA Forward Enterprise” adlı yeni kommersiya şirkətinin baş icraçı direktoru və ya komissarı olmasının planlaşdırıldığını yazıb.
Nəşrin məlumatına görə, İnfantino əvvəlcə yeni şirkətin sədri kimi fəaliyyət göstərə, FIFA-dakı prezidentlik müddəti başa çatdıqdan sonra isə qurumun gündəlik rəhbərliyini öz üzərinə götürə bilərdi. Onun illik 30 milyon dollar baza maaşı ilə yanaşı əlavə bonuslar alacağı iddia edilib. FIFA isə belə bir maaşın müzakirə olunduğunu təkzib edib.
Layihə FIFA-nın televiziya yayımı, sponsorluq, lisenziyalaşdırma, bilet satışı, qonaqpərvərlik və turnirlərin təşkili ilə bağlı fəaliyyətlərini ayrıca kommersiya strukturunda birləşdirməyi nəzərdə tuturdu. Dəyəri 20 milyard dollar qiymətləndirilən şirkətin 20 faizə qədər payının özəl investorlara satılması və bu yolla təxminən 4,2 milyard dollar cəlb edilməsi planlaşdırılırdı.
İnvestor qrupuna Coşua Kuşnerlə əlaqəli “Thrive Eternal” fondunun rəhbərlik edəcəyi bildirilirdi. FIFA isə yeni qurumun nəzarət paketini özündə saxlayacağını və futbolun idarə edilməsinin investorların təsiri altına düşməyəcəyini açıqlamışdı.
FIFA-nın rəsmi təqdimatına əsasən, layihə qəbul olunsaydı, 211 üzv assosiasiyanın hər biri 2027–2030-cu illərdə 20 milyon dollar əlavə inkişaf maliyyəsi ala bilərdi. Assosiasiyalara ayrıca proqram vasitəsilə daha 20 milyon dollar əldə etmək imkanı da vəd olunurdu.
İnfantinonun maaşının “10 dəfə artacağı” barədə müqayisə yalnız baza maaşına aiddir. FIFA-nın 2025-ci il üzrə açıqladığı göstəricilərə görə, onun baza maaşı 2,6 milyon İsveçrə frankı, dəyişən mükafatı isə 2,2 milyon frank olub. Beləliklə, bonuslarla birlikdə ümumi illik ödəniş təxminən 4,8 milyon İsveçrə frankına çatıb.
Layihə UEFA, digər konfederasiyalar və milli futbol federasiyalarının kəskin etirazına səbəb olub. Tənqidçilər Dünya çempionatının gəlirlərinin özəl investorlara açılmasının FIFA-nın qeyri-kommersiya mahiyyətinə və futbolun idarəçilik prinsiplərinə zidd ola biləcəyini bildiriblər.
Genişmiqyaslı etirazlardan sonra İnfantino iyulun 31-də “FIFA Forward Enterprise” layihəsinin davam etdirilməyəcəyini rəsmən açıqlayıb. O, təklifin futbol ictimaiyyətində parçalanma yaratdığını və ilkin məqsədə artıq xidmət etmədiyini bildirib.
