Hindistanın təhsil naziri Dharmendra Pradhan imtahan suallarının sızdırılmasına etiraz edən gənclərin həftələrlə davam edən kütləvi aksiyalarından sonra istefa verib.
MSNews.az xəbər verir ki, Pradhan istefa məktubunu Baş nazir Narendra Modiyə təqdim etdiyini iyulun 25-də sosial şəbəkə hesabında açıqlayıb. Nazir ölkə daxilində yaranmış vəziyyətdən “dövlət əleyhinə qüvvələrin istifadə etməməsi” üçün bu qərarı verdiyini bildirib və Hindistan gənclərinin istək və gözləntilərinə hörmətlə yanaşdığını vurğulayıb.
Bu barədə “Reuters” məlumat yayıb.
Pradhanın istefası “Cockroach Janta Party” — “Tarakan Xalq Partiyası” adlanan gənclər hərəkatının əsas tələblərindən biri idi. CJP-nin qurucusu Abhicet Dipke qərarı etirazçıların qələbəsi kimi qiymətləndirərək “Biz bunu bacardıq” deyib.
Nazirin istefasından sonra Hindistan hökumətinin nümayəndələri CJP rəhbərliyi ilə danışıqlar aparıb. Səhiyyə naziri Caqat Prakaş Nadda hökumətin imtahan sistemində islahatlar aparılması, etirazçılara qarşı açılan bəzi işlərin dayandırılması və imtahan qalmaqalından sonra intihar edən tələbələrin ailələrinə kompensasiya verilməsi daxil olmaqla hərəkatın tələblərini qəbul etdiyini açıqlayıb. Kompensasiyanın konkret məbləği barədə rəsmi məlumat verilməyib.
CJP nümayəndələri bundan sonra aksiyaların “xoş niyyətlə” dayandırıldığını elan edərək tərəfdarlarını etiraz məkanlarını dinc şəkildə tərk etməyə çağırıblar. Beləliklə, hərəkatın etirazları davam etdirəcəyi barədə əvvəl yayılmış məlumatlar sonrakı hadisələrlə aktuallığını itirib. “Al Jazeera” bildirir ki, hökumət nümayəndələri etirazçıların bütün əsas tələblərinin qəbul olunduğunu bəyan ediblər.
Etirazların başlamasına may ayında milli tibb universitetlərinə qəbul imtahanının suallarının sızdırılması səbəb olub. Qalmaqal nəticəsində imtahan nəticələri ləğv edilib və təxminən iki milyon namizəd təkrar imtahan verməli olub. Hadisə Hindistanda təhsil sisteminin etibarlılığı, korrupsiya, işsizlik və gənclər üçün imkanların məhdudluğu ilə bağlı daha geniş narazılığa çevrilib.
“Cockroach Janta Party” may ayında Hindistan Ali Məhkəməsinin baş hakimi Surya Kantın bəzi işsiz gəncləri “tarakanlarla” müqayisə etməsi kimi qəbul olunan fikirlərindən sonra yaranıb. “Associated Press” yazır ki, əvvəlcə sosial şəbəkələrdə zarafat və siyasi satira kimi başlayan təşəbbüs qısa müddətdə milyonlarla tərəfdar qazanan ümummilli gənclər hərəkatına çevrilib.
Hərəkatın qurucusu Abhicet Dipke 2023-cü ildə ictimaiyyətlə əlaqələr üzrə magistr təhsili almaq üçün ABŞ-yə gedib. Dipke və tərəfdarlarının sosial şəbəkələrdə yaratdığı kampaniya gənclərin siyasi proseslərdə təmsil olunması, iş yerlərinin artırılması və dövlət qurumlarının məsuliyyət daşıması kimi məsələləri ölkənin əsas gündəminə gətirib. “Reuters” hərəkatın sosial media hesabının qısa müddətdə on milyonlarla izləyici topladığını bildirib.
Etirazlar həftə ərzində daha da gərginləşmiş, Yeni Dehlidə parlamentə doğru yürüş edən nümayişçilərlə polis arasında qarşıdurma baş vermişdi. Polis izdihamı dağıtmaq üçün gözyaşardıcı qaz və dəyənəklərdən istifadə etmişdi. Bu görüntülər ictimai narazılığı artırmış və hökumət üzərindəki təzyiqi gücləndirmişdi.
Pradhan Narendra Modinin 2014-cü ildə hakimiyyətə gəlməsindən sonra qalmaqal fonunda istefa verən ikinci hökumət üzvü olub. Onun vəzifədən getməsi Modinin üçüncü hökuməti dövründə gənclərin rəhbərlik etdiyi etiraz hərəkatının mühüm siyasi qələbəsi kimi qiymətləndirilir.
