Rusiya dövlət başçısı Vladimir Putin çərşənbə günü Suriyanın müvəqqəti prezidenti Əhməd əş-Şaraa ilə Moskvada görüşüb. Bu, Bəşşar Əsədin devrilməsindən bir il sonra hər iki liderin ilk rəsmi görüşüdür.
Görüşün bir hissəsi mətbuatın iştirakı ilə keçirildi. Putin, Şaraanın və Suriyanın keçdiyi yolu yüksək qiymətləndirərək bildirdi: “Suriyanın ərazi bütövlüyünün bərpası istiqamətindəki səylərinizi diqqətlə izləyirik və bu prosesin sürətlənməsinə görə sizi təbrik etmək istəyirəm. Suriyanın ərazi bütövlüyünün bərpasını həmişə müdafiə etmişik – bunu bilirsiniz – və bu istiqamətdə bütün səylərinizi dəstəkləyirik.”
Putin Fərat bölgəsinin inteqrasiyasının Suriyanın ərazi bütövlüyünün bərpasına mühüm töhfə verəcəyini vurğuladı və “Bunun üçün sizi təbrik edirik. Sizi görmək çox xoşdur. Xoş gəlmisiniz, cənab Prezident” deyə Şaraanı qarşıladı.
Kremlin açıqlamasına görə, görüşdə Rusiyanın Suriyadakı hərbi mövcudluğu müzakirə olunacaq. Rusiya Suriyada iki dəniz bazası saxlayır.
SDQ-nin çoxluq təşkil etdiyi Qamışlı bölgəsindəki rus hərbçiləri isə bu həftə qəfil şəkildə Suriyadan çıxmağa başlayıb.
Şaraa vəziyyətə fərqli baxış bucağından yanaşaraq bəyan edib: “Suriya artıq qlobal güclərlə düşmənçilik apara biləcək vəziyyətdə deyil və biz buna görə Rusiyadan ölkəmizin yenidən qurulması prosesində bizə səmimi şəkildə dəstək olmasını xahiş edirik.”
Kremlin sözçüsü Dmitri Peskov, Moskva ilə Dəməşq arasında münasibətlərin keçmiş hökumətin devrilməsindən bu yana sabit şəkildə inkişaf etdiyini bildirdi.
Peskov danışıqların əhəmiyyətinə diqqət çəkərək, Əsədın ekstradisiyası məsələsinin gündəmə gəlib-gəlməyəcəyi barədə şərh verməkdən çəkindi.
Vaşinqtonun dəstəyini əhəmiyyətli dərəcədə kəsdiyi Suriya Demokratik Qüvvələrinin nəzarətindəki bölgələrdə hakimiyyət qurmağa başlayan Şaraa administrasiyası, ABŞ tərəfindən artıq İŞİD təhlükəsi ilə tək mübarizə apara biləcək qüvvə kimi görülür.
Şaraanın bu mövzunu da Putin ilə müzakirə etməsi gözlənilir. İŞİD Rusiyadakı Krokus ticarət mərkəzində törədilən qırğında yüzdən çox rus vətəndaşını öldürmüşdü. Kremlin İŞİD-ə qarşı Suriyanı dəstəkləməyə hazırdır.
