Türkiyə Respublikasının Prezidenti Rəcəb Tayyib Ərdoğan Yunanıstanın Baş naziri Kiryakos Miçotakis ilə keçirdiyi görüşdən sonra bəyan edib ki, iki ölkə arasında mövcud problemlər mürəkkəb olsa da, beynəlxalq hüquq çərçivəsində həllolunmaz deyil və əsas şərt xoş niyyət, konstruktiv dialoq və siyasi iradənin mövcudluğudur. Ərdoğan bildirib ki, iki qonşu və NATO müttəfiqi olan Türkiyə və Yunanıstan əməkdaşlığı əsas götürərək dialoq kanallarını açıq saxlamalıdır.
Prezident Ərdoğan Yüksək Səviyyəli Əməkdaşlıq Şurasının 6-cı iclası çərçivəsində keçirilən danışıqlarda Egey və Şərqi Aralıq dənizi məsələlərinin açıq və səmimi şəkildə müzakirə olunduğunu qeyd edib. O vurğulayıb ki, 2023-cü ildə Afinada imzalanan Afina Bəyannaməsi tərəflərin dialoqu davam etdirmək iradəsini rəsmiləşdirib və bu gün müsbət gündəm çərçivəsində münasibətlərin daha da inkişaf etdirilməsi imkanları ətraflı nəzərdən keçirilib. Ərdoğan ikitərəfli ticarət dövriyyəsinin ötən il təxminən 7 milyard dollara çatdığını, bu rəqəmin 10 milyard dollara yüksəldilməsinin hədəfləndiyini bildirib və iki ölkənin işgüzar dairələrinin bu istiqamətdə fəal əməkdaşlıq etdiyini vurğulayıb.
Görüşdə azlıqların hüquqları mövzusu da müzakirə edilib. Prezident Ərdoğan Qərbi Trakiyada yaşayan türk azlığın dini azadlıqlar və təhsil imkanlarından tam şəkildə yararlanması ilə bağlı gözləntilərini Yunanıstan Baş nazirinin diqqətinə çatdırıb. O, həmçinin terrorizm və mütəşəkkil cinayətkarlıqla mübarizədə əməkdaşlığın vacibliyini qeyd edib.
Regional məsələlərə toxunan Prezident Ərdoğan Qəzza, Fələstin, Suriya və Orta Şərqdəki son proseslər barədə fikir mübadiləsi aparıldığını bildirib. O, Yaxın Şərqdə davamlı sülhün yalnız Fələstin probleminin iki dövlət prinsipi əsasında ədalətli həlli ilə mümkün olduğunu vurğulayıb və Yunanıstanın BMT Təhlükəsizlik Şurasının qeyri-daimi üzvü kimi bu mövzunu gündəmdə saxlayacağına ümid etdiyini qeyd edib. Ərdoğan Suriyanın ərazi bütövlüyü və birliyi əsasında sabitliyə qovuşmasının həm region, həm də Avropa üçün mühüm əhəmiyyət daşıdığını bildirib.
Yunanıstanın Baş naziri Kiryakos Miçotakis isə Ankarada keçirilən Yüksək Səviyyəli Əməkdaşlıq Şurasının iclaslarının yaxşı qonşuluq münasibətlərinin və dialoqun nə qədər vacib olduğunu göstərdiyini deyib. O, iki ölkə arasında siyasi dialoq, müsbət gündəm və etimad quruculuğu tədbirləri çərçivəsində mühüm irəliləyişlərin əldə olunduğunu vurğulayıb. Miçotakis, qısa müddətli viza tətbiqinin uğurlu nəticələr verdiyini, yüz minlərlə Türkiyə vətəndaşının Yunan adalarını ziyarət etdiyini və bunun xalqlar arasında yaxınlaşmaya töhfə verdiyini bildirib.
Baş nazir, qeyri-qanuni miqrasiya ilə mübarizədə əməkdaşlıq sayəsində 2026-cı ildə miqrasiya axınında təxminən 60 faiz azalma qeydə alındığını açıqlayıb. O, Egey dənizi, kontinental şelf və müstəsna iqtisadi zona kimi məsələlərdə fikir ayrılıqlarının mövcud olduğunu, lakin bu problemlərin beynəlxalq hüquq çərçivəsində və zərurət yaranarsa beynəlxalq məhkəmə vasitəsilə həll oluna biləcəyini qeyd edib. Miçotakis Türkiyə və Yunanıstanın regionun iki mühüm dövləti kimi sabitlik naminə əməkdaşlıq edə biləcəyini vurğulayıb.
