Çilidə keçirilən prezident seçkilərinin ikinci turunda ABŞ-ın dəstəklədiyi sağçı namizəd Xose Antonio Kast böyük səs fərqi ilə qalib gəlib. Çili Seçki Xidmətinin (SERVEL) açıqladığı ilkin nəticələrə görə, seçki qutularının 99 faizi açılıb.
Nəticələrə əsasən, Respublikaçı Partiyanın namizədi olan 59 yaşlı hüquqşünas Kast səslərin 58,2 faizini toplayaraq prezident seçilib. Hakim koalisiyanın dəstəklədiyi solçu namizəd Canett Hara isə 41,8 faiz səs toplayıb və məğlubiyyəti qəbul edib.
Canett Hara çıxışında rəqibini təbrik edərək bildirib ki, demokratiya xalqın iradəsini aydın şəkildə ortaya qoyub və bu qərara hörmət edilməlidir.
Hazırkı dövlət başçısı Qabriel Borik də canlı yayımda Kastı təbrik edərək, ölkənin maraqları naminə əməkdaşlığa açıq olacağını vurğulayıb. Kast isə səlahiyyətlərin dinc və hörmət çərçivəsində təhvil veriləcəyini bildirib.
ABŞ tərəfindən dəstəkləndiyi qeyd olunan Xose Antonio Kast, siyasi baxışlarına görə sərt sağçı mövqeyi və keçmiş hərbi diktator Auqusto Pinoçet dövrünə müsbət yanaşması ilə tanınır. O, seçki kampaniyasında ictimai təhlükəsizlik, miqrasiya nəzarəti, dövlətin kiçildilməsi, azad bazar iqtisadiyyatı və mühafizəkar sosial siyasəti ön plana çıxarıb.
Xose Antonio Kast 11 mart 2026-cı ildə keçiriləcək andiçmə mərasimi ilə vəzifəsinin icrasına başlayacaq.
