Cənubi Koreyada yerli seçkilər zamanı bülleten çatışmazlığı minlərlə insanın etirazına səbəb olub.
MSNews.az xəbər verir ki, “Reuters”in məlumatına görə, Seulda 6 mindən çox insan “SK Olympic Handball Stadium”-un qarşısında toplaşaraq seçkilərin yenidən keçirilməsini tələb edib. Səslərin sayıldığı mərkəzdə keçirilən aksiyada iştirakçılar “Təkrar seçki!” şüarları səsləndiriblər.
Etirazlar iyunun 3-də keçirilən yerli seçkilər zamanı bəzi məntəqələrdə bülletenlərin çatışmamasından sonra başlayıb. Seçkilərdə merlər, əyalət qubernatorları, rayon rəsmiləri və yerli məclis üzvləri müəyyənləşdirilib.
Milli Seçki Komissiyasının məlumatına görə, ölkə üzrə 14 300 seçki məntəqəsindən 50-də bülletenlər tükənib və əlavə bülletenlərin gətirilməsinə ehtiyac yaranıb. Daha 22 məntəqədə isə təchizatın gecikməsi səbəbindən səsvermə prosesi pozulub.
Bəzi məntəqələrdə seçicilər rəsmi səsvermə müddəti başa çatdıqdan sonra saatlarla gözləməli olublar. “Reuters” yazır ki, Seulun Sonqpa rayonundakı məntəqələrdən birində narazı seçicilər və etirazçılar bülleten qutularının səslərin sayıldığı mərkəzə aparılmasına mane olublar.
Hadisələrdən sonra Milli Seçki Komissiyasının rəhbəri Ro Te Ak istefa verəcəyini açıqlayıb. O bildirib ki, seçki prosesində baş verən nasazlıq ictimaiyyətin demokratik prosesə inamına zərbə vurub və bunun üçün heç bir bəhanə ola bilməz.
Komissiya rəsmisi açıqlamasında bülletenlərin yalnız seçicilərin 50 faizi üçün çap edildiyini bildirib. Buna səbəb əvvəlki həftə keçirilən erkən səsvermədə yüksək iştirak göstəricisinin qeydə alınması olub. Üç günlük ümumi səsvermə prosesi üçün bülletenlərin seçicilərin 73 faizinə çatacaq qədər hazırlandığı, yekun seçici fəallığının isə 63 faiz olduğu qeyd edilib.
Cənubi Koreya Prezidenti Li Çje Myon hadisəyə görə dərin təəssüfünü bildirib və seçicilərin səsvermə hüququnun heç vaxt zədələnməməli olduğunu vurğulayıb. “Reuters”in məlumatına görə, Prezident məsul şəxslərin cavabdehlik daşımalı olduğunu deyib.
Milli Seçki Komissiyası xarici ekspertlərin iştirakı ilə araşdırma aparılacağını bildirib. Ro Te Ak araşdırma nəticələrini qəbul edəcəyini açıqlayıb.
Yerli seçkilər Cənubi Koreyada Prezident Li Çje Myon administrasiyasının ilk ili üçün mühüm siyasi sınaq kimi qiymətləndirilirdi. “Reuters”in məlumatına görə, hakim Demokratik Partiya əksər böyük şəhər və əyalətlərdə üstünlük qazansa da, Seul meri seçkisində müxalifətin namizədi qalib gəlib.
Hazırda etirazçıların təkrar seçki tələbinin hüquqi nəticə doğurub-doğurmayacağı məlum deyil. Milli Seçki Komissiyası baş verənləri seçki idarəçiliyində ciddi uğursuzluq kimi qiymətləndirir və araşdırmanın nəticələrindən sonra əlavə tədbirlərin görüləcəyini bildirir.
