Cənubi Koreya Prezident Administrasiyası iki Şimali Koreya hərbi əsirinin Ukraynadan Cənubi Koreyaya təhvil verilməsi barədə məlumatın açıqlanması ilə bağlı Kiyevdən rəsmi izahat və üzr tələb edib. Seul Ukraynanın razılaşdırılmış məxfiliyi pozduğunu bildirir, Kiyev isə belə bir razılaşmanın mövcudluğunu inkar edir.
MSNews.az xəbər verir ki, “Reuters”-in məlumatına görə, Cənubi Koreya Prezident Administrasiyasının ictimaiyyətlə əlaqələr üzrə baş katibi Son Gi Hon məsələ ilə bağlı sərt bəyanat yayıb.
“Prezident Administrasiyası Ukrayna tərəfinin məlumatı birtərəfli şəkildə açıqlamasından və daha sonra məxfilik barədə razılaşmanın olmadığını yalandan bəyan etməsindən dərin təəssüf hissi keçirir”, – bəyanatda deyilir. Son əlavə edib ki, Seul zərurət yaranacağı təqdirdə əlavə tədbirləri də nəzərdən keçirir.
Cənubi Koreya tərəfinin versiyasına görə, Ukrayna iki Şimali Koreya əsgərinin təhvil verilməsini müxtəlif kanallar vasitəsilə Seulla dəfələrlə müzakirə edib və prosesin məxfi saxlanılmasını özü istəyib. Seul bildirir ki, məlumatın açıqlanmasının Ukraynada həmin əsgərlərin ukraynalı hərbi əsirlərlə dəyişdirilməsi imkanının itirilməsi ilə bağlı tənqidlər doğura biləcəyi əsas gətirilib. Cənubi Koreya isə əsgərlərin və ailələrinin təhlükəsizliyi, diplomatik və humanitar amilləri nəzərə alaraq məxfiliyə razılıq verdiyini bildirir.
Mübahisə Ukrayna Prezidenti Volodimir Zelenskinin sentyabrın 23-də BMT Baş Assambleyasındakı çıxışından sonra yaranıb. Zelenski Ukraynanın Rusiyanın Kursk vilayətində əsir götürdüyü iki Şimali Koreya hərbçisini Cənubi Koreyaya göndərdiyini ilk dəfə açıq şəkildə bildirib.
Zelenski əsgərlərdən birinin əsir düşəcəyini anlayarkən intihara cəhd etdiyini də söyləyib. Cənubi Koreya XİN bundan sonra təhvilverməni birbaşa təsdiq və ya təkzib etməsə də, Kiyevlə danışıqlar aparıldığını və məsələyə hərbçilərin iradəsi, beynəlxalq hüquq və humanitar prinsiplər nəzərə alınmaqla yanaşıldığını açıqlayıb.
Kiyev isə Seulun məxfilik razılaşması barədə iddiasını qəbul etmir. “RBK-Ukrayna”-ya danışan Ukrayna Prezident Ofisindəki mənbə ölkəsinin məlumatı gizli saxlamaq öhdəliyi götürmədiyini bildirib. Mənbə hərbi əsirlərlə bağlı məsələlərdə Ukrayna ictimaiyyətinin məlumat almaq hüququnun olduğunu vurğulayıb. Prezidentin müşaviri Dmitri Litvin də belə bir məxfilik razılaşmasının olmadığını deyib.
Məsələnin əlavə detalı ondan ibarətdir ki, Cənubi Koreya Prezident Administrasiyası Ukraynanın Zelenskinin çıxışından əvvəl Seula əsirlərin təhvil verilməsi mövzusunun çıxışda səslənə biləcəyi barədə məlumat verdiyini də təsdiqləyib. Bununla belə, Seul əvvəlcədən xəbərdar edilməsinin məlumatın ictimailəşdirilməsinə razılıq verilməsi anlamına gəlmədiyini bildirir.
