İsveçrənin italyan dilli bölgəsində yerləşən Luqano şəhərində nağd pul istifadəsi sona çatıb və yerli əhali tamamilə rəqəmsal pul sisteminə keçib.
Artıq şəhərdəki mağaza və restoranların böyük əksəriyyəti kriptovalyuta ilə ödənişləri qəbul edir, vətəndaşlar isə gündəlik alış-verişlərini smartfonlarındakı rəqəmsal cüzdanlar vasitəsilə təmasız şəkildə həyata keçirə bilirlər.
Hamburger restoranlarından kafelərə qədər geniş çeşiddə müəssisələrdə rəqəmsal ödəniş mümkündür. Məsələn, bir fincan qəhvənin ödənişi 0.00008629 bitcoin təşkil edir ki, bu da təxminən 8,80 ABŞ dollarına bərabərdir. Luqano bələdiyyəsi də bu dəyişikliklərə uyğunlaşaraq məktəbəqədər uşaq baxımı daxil olmaqla bəzi rəsmi ödənişlərdə rəqəmsal pulu qəbul etməyə başlayıb.
Şəhərdə kriptovalyuta istifadəsini təşviq edən əsas təşəbbüs 2022-ci ildə Luqano Bələdiyyəsi ilə Tether platforması arasında həyata keçirilən “Plan B” layihəsidir. Layihənin direktoru Mir Liponi bildirib ki, bankında yaranan problem səbəbindən 11 gün boyunca yalnız bitcoin istifadə edərək yaşamağı sınaqdan keçirib və Luqanoda bu praktikanın geniş şəkildə mümkün olduğunu vurğulayıb.
Luqano bələdiyyə başçısı Mişel Foletti isə şəhərdə rəqəmsal pul istifadəsinin qanunsuz fəaliyyətlər üçün risk yaratdığı iddialarını rədd edib. O bildirib ki, cinayətkar təşkilatlar hələ də narkotik ticarəti kimi qeyri-qanuni əməliyyatlarda fiziki nağd pulu üstün tutur, rəqəmsal pul isə anonimlik baxımından nağd puldan daha məhduddur.
