Böyük Britaniya Ukraynaya 10 milyard funt-sterlinqdən çox həcmdə yeni iqtisadi və hərbi dəstək proqramı elan edib. Londonun Ukrayna üçün indiyədək açıqladığı ən böyük maliyyə paketinə iqtisadi sabitliyin qorunması, müdafiə imkanlarının gücləndirilməsi və qış aylarında hava hücumlarından mühafizənin təmin olunması istiqamətində tədbirlər daxildir.
MSNews.az xəbər verir ki, bu barədə Böyük Britaniya hökuməti oktyabrın 28-də rəsmi açıqlama yayıb. Baş nazir Endi Börnhem və maliyyə naziri Con Hili həmin gün Ukrayna Prezidenti Vladimir Zelenski ilə telefon danışığı apararaq yeni yardım proqramı barədə məlumat veriblər.
Yeni dəstək proqramı Ukraynanın həm iqtisadi, həm də müdafiə ehtiyaclarını əhatə edir. İqtisadi dəstəyin 5,5 milyard funtluq hissəsi Dünya Bankı vasitəsilə veriləcək kreditlər üçün dövlət zəmanətlərini əhatə edir.
Bundan başqa, Britaniya Dünya Bankının Beynəlxalq İnkişaf Assosiasiyasının böhran fonduna 500 milyon funt qrant ayıracaq. Bu vəsait vasitəsilə Ukrayna üçün ümumilikdə 1,5 milyard funt maliyyə resursunun səfərbər edilməsi nəzərdə tutulur.
Qeyd edək ki, bütün 10 milyard funt birbaşa nağd yardım deyil. Paketə kredit zəmanətləri, ixrac maliyyələşdirməsi imkanları və birbaşa hərbi dəstək daxildir.
Britaniya Müdafiə Nazirliyi qış ayları üçün əlavə 500 milyon funt hərbi yardım ayıracaq. Bu vəsait əsasən Ukraynanın hava hücumundan müdafiə sistemlərindəki çatışmazlıqların aradan qaldırılmasına yönəldiləcək.
Rusiya tərəfindən Ukraynanın enerji obyektlərinə endirilən zərbələr fonunda London elektrik təchizatı və digər mühüm infrastrukturun qorunmasını prioritet hesab edir.
Britaniya hökumətinin məlumatına görə, yeni qərarla ölkənin Ukraynaya 2026-cı ildə göstərdiyi hərbi dəstək 4,3 milyard funt-sterlinqə çatıb.
Yeni proqram çərçivəsində Böyük Britaniyanın İxracatın Maliyyələşdirilməsi Agentliyinin (UKEF) Ukrayna üzrə maliyyə təminatı limiti əlavə 3 milyard funt artırılır. Bununla da, agentliyin Ukrayna ilə bağlı ümumi təminat limiti 6,5 milyard funt-sterlinqə yüksəlir.
Bu imkanlardan ilk növbədə hərbi təyinatlı məhsulların, o cümlədən Ukraynanın ehtiyac duyduğu müasir silahların tədarükündə istifadə olunması planlaşdırılır.
Ukrayna Prezidenti Vladimir Zelenski Britaniyanın qərarını yüksək qiymətləndirib. O bildirib ki, belə bir dəstək Rusiyanın Ukraynanı zəiflətməyə çalışdığı dövrdə xüsusi əhəmiyyət daşıyır.
“Bu, həqiqətən güclü və çox vaxtında atılmış addımdır. Rusiya Ukraynanın problemlərlə təkbaşına mübarizə aparmayacağını görməlidir”, – deyə Zelenski vurğulayıb.
Ukrayna lideri yeni maliyyə imkanlarının ölkənin müdafiə qabiliyyətini gücləndirəcəyini və silah tədarükünü genişləndirəcəyini qeyd edib.
Böyük Britaniyanın Baş naziri Endi Börnhem yeni paketi ölkəsinin Ukraynaya uzunmüddətli dəstəyinin göstəricisi adlandırıb. Maliyyə naziri Con Hili isə parlamentdəki çıxışında Moskvaya mesaj ünvanlayıb:
“Bu gün Moskvaya aydın mesaj göndəririk: Britaniya nə qədər lazımdırsa, Ukraynanın yanında olacaq”.
Britaniya hökumətinin açıqlamasına görə, yeni paket də daxil olmaqla Londonun Ukraynaya elan etdiyi ümumi dəstək 35 milyard funt-sterlinqə çatıb. Bu məbləğ hərbi yardım, iqtisadi vəsaitlər, kredit zəmanətləri və ixrac maliyyələşdirməsi limitlərini əhatə edir.
