Bolqarıstanda aprelin 19-da keçiriləcək növbədənkənar parlament seçkiləri ərəfəsində sorğularda sabiq prezident Rumen Radevin rəhbərlik etdiyi “Progressive Bulgaria” koalisiyası önə çıxıb.
“Reuters” yazır ki, Radev xüsusilə yaşlı və kənd yerlərində yaşayan seçicilərin dəstəyi ilə korrupsiyaya qarşı mübarizə və siyasi sabitlik vədləri fonunda yarışa liderlik edir.
Səsvermə Bolqarıstanda son beş ildə keçirilən səkkizinci seçki olacaq. Ölkə uzunmüddətli siyasi böhran, zəif koalisiyalar və seçki institutlarına etimadın azalması fonunda yenidən sandıq başına gedir.
Radev kampaniyasında korrupsiyaya son qoyacağını və bölgələrdə təsir gücünə malik “yerli feodallar”a qarşı mübarizə aparacağını bildirib. Bu ritorika ölkədə korrupsiya ilə bağlı narazılıqların artdığı bir dövrə təsadüf edir. “Transparency International”-ın 2025 Korrupsiya Qavrayışı İndeksinə görə, Bolqarıstan 182 ölkə arasında 84-cü yerdə qərarlaşıb və 40 balla Avropa İttifaqında ən zəif nəticə göstərən ölkələrdən biri olub.
Bununla yanaşı, Radevin Rusiyaya daha yaxın mövqeyi seçkinin xarici siyasət nəticələrini də diqqət mərkəzinə gətirib. “Reuters” yazır ki, o, Bolqarıstanın avrozonaya qoşulmasını və Ukrayna ilə təhlükəsizlik sazişini tənqid edir, eyni zamanda Moskva ilə münasibətlərin bərpasını müdafiə edir. Bu mövqe onun mümkün qələbəsinin Sofiyanın Brüssel və Kiyevlə xəttində dəyişiklik yarada biləcəyi ehtimalını gücləndirir.
Ancaq Radevin qarşısında əsas çətinlik təkbaşına hökumət qura bilməməsidir. Onun koalisiyasının dəstəyi təxminən 30 faiz civarındadır və bu, parlament çoxluğu üçün kifayət etmir. Buna görə seçkidən sonra yenə koalisiya danışıqları gündəmə gələ bilər ki, bu da onun planlarını yumşalda bilər.
