Avropanın müxtəlif ölkələrində ən populyar mesajlaşma tətbiqlərini göstərdiyi iddia olunan xəritə sosial şəbəkələrdə geniş yayılıb.
MSNews.az xəbər verir ki, xəritədə “Telegram” Azərbaycan, Belarus, Ukrayna və Moldovada, “WhatsApp” Qərbi Avropada, “Viber” Balkan ölkələrində, “Facebook Messenger” isə Şimali və Mərkəzi Avropanın bir sıra dövlətlərində lider kimi göstərilir.
Lakin xəritədə istifadə edilən məlumatların tarixi, mənbəyi və “populyarlığın” hansı göstəriciyə əsasən hesablandığı göstərilmədiyindən nəticələri qəti statistika kimi qəbul etmək mümkün deyil.
Yayılan xəritədə “Telegram” Azərbaycanda ən populyar messencer kimi təqdim olunur. Ancaq “Similarweb”in 15 iyul 2026-cı il üzrə Android tətbiqləri reytinqində “WhatsApp” ölkənin “Communication” kateqoriyasında birinci yerdədir. İkinci pillədə “WhatsApp Business”, üçüncü yerdə isə “Snapchat” qərarlaşıb.
“Similarweb”in bütün pulsuz Android tətbiqlərini əhatə edən Azərbaycan reytinqində də “WhatsApp” birinci yeri tutur. Bu göstərici bütün istifadəçilərin faktiki aktivliyini tam əks etdirməsə də, “Telegram”ın hazırda mübahisəsiz lider olduğunu deməyə əsas vermir.
Paylaşımda “Facebook Messenger”in “bizdə qadağan olunmuş” tətbiq olduğu qeyd edilir. Bu ifadə, ehtimal ki, başqa ölkə üçün hazırlanmış rusdilli mətndən olduğu kimi tərcümə edilib.
“Facebook Messenger” Azərbaycanda ümumi qaydada qadağan olunmayıb. Tətbiq “Meta Platforms” tərəfindən Azərbaycan regionu üçün “Apple App Store”da pulsuz təqdim edilir və minlərlə yerli qiymətləndirməyə malikdir.
Azərbaycanda 2020-ci il müharibəsi və 2022-ci ildəki gərginlik zamanı “Facebook”, “WhatsApp”, “Messenger” və başqa platformalara müvəqqəti giriş məhdudiyyətləri tətbiq edilmişdi. Lakin həmin dövrlərdəki məhdudiyyətlər “Messenger”in hazırda ölkədə daimi qadağan olunması demək deyil.
“Similarweb”in 2025-ci il araşdırmasına görə, “Telegram” Belarus və Moldovada ən yüksək mövqeyə malik mesajlaşma tətbiqi kimi göstərilib. Platforma Rusiya, Qazaxıstan və Özbəkistanda da birinci yerdə qərarlaşıb.
Ukraynada isə “Telegram”ın xəbər, ictimai informasiya və müharibə ilə bağlı operativ məlumatların yayılmasında böyük rolu olsa da, şəxsi yazışmalarda “Viber” və “WhatsApp” da geniş istifadə edilir. Buna görə Ukrayna üçün də vahid və dəyişməz lider göstərmək mübahisəlidir.
Müxtəlif araşdırmalar Fransa, Almaniya, İtaliya, İspaniya, Portuqaliya, Avstriya, Belçika, İsveçrə və Böyük Britaniya kimi ölkələrdə “WhatsApp”ın aparıcı mesajlaşma tətbiqi olduğunu göstərir. “Similarweb”in araşdırmasına əsasən, “WhatsApp” təhlil edilən 100 ölkədən 70-də birinci yeri tutub.
Platformanın qlobal üstünlüyü onun geniş cihaz əhatəsi, telefon nömrəsi vasitəsilə sadə qeydiyyat və istifadəçilərin böyük hissəsinin artıq tətbiqdə olması ilə əlaqələndirilir.
“Viber” xüsusilə Yunanıstan, Bolqarıstan və Serbiyada güclü mövqeyə malikdir. “Infobip” “Viber”i Belarus, Bolqarıstan, Yunanıstan və Serbiyada birinci yerdə olan tətbiq kimi göstərir.
Lakin Balkanların hamısında “Viber”in lider olduğunu söyləmək olmaz. Məsələn, 2026-cı ildə yayımlanan “LINK Mobility” cədvəlində Xorvatiya, Sloveniya və Rumıniyada “WhatsApp” üstün platforma kimi göstərilib.
Şimali Avropada “Facebook Messenger”in geniş istifadə edilməsi barədə məlumatlar mövcuddur. “LINK Mobility” Danimarka, Norveç, İsveç, Estoniya, Litva, Polşa və Macarıstanda “Messenger”in lider olduğunu yazır.
Ancaq “Similarweb”in 2025-ci il araşdırması “Facebook Messenger”in böyük qlobal istifadəçi bazasına baxmayaraq, təhlil edilən ölkələrin heç birində birinci yeri tutmadığını bildirir.
Bu ziddiyyət araşdırmaların fərqli meyarlara əsaslanması ilə bağlıdır. Bəzi siyahılar aylıq aktiv istifadəçiləri və sorğuları, digərləri isə endirmələri, tətbiqin cihazlarda quraşdırılma faizini və Android mağazasındakı mövqeyini ölçür. “Similarweb” də öz hesabatında yüklənmə, quraşdırılma səviyyəsi, gündəlik və aylıq aktiv istifadəçilər kimi bir neçə fərqli göstəricidən istifadə etdiyini açıqlayır.
