Almaniyada on minlərlə məktəbli və gənc mümkün məcburi hərbi xidmətə və yeni hərbi qeydiyyat sisteminə etiraz olaraq küçələrə çıxıb. “Hərbi çağırışa qarşı məktəb tətili” (“Schulstreik gegen Wehrpflicht”) təşəbbüsünün məlumatına görə, sentyabrın 25-də ölkənin təxminən 100 şəhərində keçirilən aksiyalarda 45 mindən çox insan iştirak edib.
MSNews.az xəbər verir ki, nümayişlər Berlin, Münhen, Frankfurt, Ştutqart, Nürnberq və Almaniyanın digər şəhərlərində təşkil olunub. “Tagesschau”nun məlumatına görə, Berlinin Veddinq rayonunda polis təxminən 2400, Münhendə 700, Nürnberqdə 400, Ştutqartda 200 və Frankfurtda 180 iştirakçı qeydə alıb. Ümumi 45 minlik rəqəm isə təşkilatçıların hesablamasıdır.
Etirazçılar arasında “Bir daha heç vaxt məcburi hərbi xidmət!”, “Hərbi çağırışa, alternativ məcburi xidmətə və müharibəyə yox” kimi şüarlar səsləndirilib. Aksiyanın təşkilatçıları hökumətin yeni hərbi xidmət modelindən məcburi elementlərin çıxarılmasını və tibbi müayinə prosedurlarının dayandırılmasını tələb edirlər.
Almaniyada yeni hərbi xidmət qanunu 1 yanvar 2026-cı ildən qüvvəyə minib. Qanuna əsasən, 18 yaşına çatan kişi və qadınlara Bundesver tərəfindən onların sağlamlığı, ixtisası və hərbi xidmətə münasibəti ilə bağlı sorğu göndərilir. Kişilər bu sorğunu cavablandırmağa məcburdur, qadınlar üçün isə cavab könüllüdür.
Hazırda hərbi xidmətin özü məcburi deyil. Almaniya hökumətinin rəsmi mövqeyinə görə, yeni sistem ilk növbədə könüllülərin sayını artırmağa hesablanıb. Bununla yanaşı, kişi vətəndaşlar üçün tibbi müayinə də yeni sistemin məcburi elementidir. Bundesver artıq bəzi şəxsləri qiymətləndirməyə çağırır, lakin bütün 2008-ci il təvəllüdlü kişiləri əhatə edəcək genişmiqyaslı məcburi müayinə sisteminin 1 iyul 2027-dən tam fəaliyyət göstərməsi nəzərdə tutulur.
Bundesverin rəsmi məlumatına görə, hazırda yeni tibbi müayinə mərkəzləri yaradılır. Ölkə üzrə 24 yeni və mövcud mərkəz bu prosesə cəlb olunacaq və sistem 2027-ci ilin iyulunadək tam qurulmalıdır.
Yeni modelə baxmayaraq, Almaniyada ümumi məcburi hərbi xidmət hələ bərpa edilməyib. Hökumətin müəyyən etdiyi şəxsi heyət hədəflərinə könüllülər vasitəsilə çatmaq mümkün olmazsa və ya təhlükəsizlik vəziyyəti kəskinləşərsə, federal hökumət “ehtiyaca əsaslanan hərbi çağırış” mexanizmini təklif edə bilər. Bunun qüvvəyə minməsi üçün Bundestaq ayrıca qanun qəbul etməlidir.
Bundesver qarşıdakı illərdə şəxsi heyətin sayını əhəmiyyətli şəkildə artırmağı planlaşdırır. Almaniya parlamentinin məlumatına görə, 2035-ci ilədək aktiv hərbçilərin sayının 255–270 min nəfərə, ehtiyat qüvvələrin isə təxminən 200 min nəfərə çatdırılması nəzərdə tutulur.
Sentyabrın 25-dəki nümayişlər yeni sistem qüvvəyə mindikdən sonra keçirilən növbəti ümummilli məktəb etirazı olub. Təşəbbüsün nümayəndələri məcburi hərbi xidmətin gündəmdən çıxarılmasına qədər aksiyaları davam etdirmək niyyətində olduqlarını bildiriblər.
