Albaniyanın paytaxtı Tiranada tələbələrin başladığı etiraz aksiyaları genişlənərək polis qüvvələri ilə şiddətli qarşıdurmalara çevrilib. Təhsil haqlarının yüksək olmasına, universitetlərin maliyyələşdirilməsindəki problemlərə və gənclər arasında işsizlik təhlükəsinə etiraz edən nümayişçilər bir neçə dövlət qurumunun binasına hücum edib. Qarşıdurmalar zamanı yanğınlar baş verib, onlarla şəxs saxlanılıb, polis əməkdaşları və mülki şəxslər xəsarət alıblar.
MSNews.az xəbər verir ki, bu barədə “Reuters” və “Associated Press” agentlikləri məlumat yayıb.
Oktyabrın 13-də şiddətlənən etirazlar ertəsi gün də davam edib. Tirananın müxtəlif universitetlərindən olan tələbələr dərsləri boykot edərək Təhsil Nazirliyinin qarşısına toplaşıblar.
Aksiyaya Tibb, Politexnik, Aqrar və digər universitetlərin tələbələri, eləcə də hökumətin siyasətindən narazı vətəndaşlar qoşulublar.
Etirazçıların əsas tələbləri təhsil xərclərinin azaldılması, universitetlərə dövlət dəstəyinin artırılması və məzunların iş imkanlarının yaxşılaşdırılmasıdır. Nümayişlər zamanı Baş nazir Edi Ramanın istefası tələbi də səsləndirilib.
Etirazlar zamanı bir qrup nümayişçi Təhsil Nazirliyinin binasına daş, beton parçaları və pirotexniki vasitələr atıb.
Polisin məlumatına görə, etirazçılardan bəziləri nazirlik binasına daxil olaraq yanğın törədiblər. Hadisə nəticəsində binanın birinci mərtəbəsinə, avadanlıqlara və sənədlərə ziyan dəyib.
“Associated Press” agentliyinin məlumatına görə, qarşıdurmalar zamanı dörd nazirlik binasına ziyan vurulub. Bundan başqa, bank filialları və digər kommersiya obyektləri də hücumların hədəfinə çevrilib.
Tirananın meriya binası yaxınlığında da qarşıdurmalar baş verib. Etirazçılar binanın qapısını sındırıb, içəri pirotexniki vasitələr atıblar.
Polis nümayişçiləri dağıtmaq üçün gözyaşardıcı qazdan və su şırnaqlarından istifadə edib.
Etirazların ilk mərhələsində 23 nəfərin polis bölmələrinə aparıldığı, altı polis əməkdaşının və bir qadın jurnalistin xəsarət aldığı bildirilmişdi.
Qarşıdurmalar davam etdikcə saxlanılanların sayı artıb.
“Associated Press”in sonrakı məlumatına əsasən, 35 nəfər saxlanılıb, 23 polis əməkdaşı və altı mülki şəxs xəsarət alıb. Rəqəmlər etirazların müxtəlif mərhələlərinə aid olduğu üçün ilkin məlumatlardan fərqlənir.
Albaniya polisi dövlət və şəxsi əmlaka zərər vuran, hüquq-mühafizə əməkdaşlarına hücum edən şəxslərin məsuliyyətə cəlb olunacağını bildirib.
Tələbələrin başladığı aksiyalar Albaniyada daha əvvəl formalaşmış hökumət əleyhinə etiraz hərəkatı ilə birləşib.
“Flaminqo inqilabı” adı ilə tanınan hərəkat hökuməti korrupsiyada və şəffaflığın təmin olunmamasında ittiham edir.
Hərəkatın etiraz etdiyi məsələlərdən biri də Albaniyanın cənub sahillərində ABŞ Prezidenti Donald Trampın kürəkəni Cared Kuşnerlə əlaqələndirilən turizm layihəsidir.
Nümayişçilər hökumətin istefasını və sosial-iqtisadi problemlərin həlli istiqamətində konkret addımlar atılmasını tələb edirlər.
Nazir hökumətin tələbələrlə dialoqa hazır olduğunu vurğulayıb.
Kumbaronun sözlərinə görə, ölkədə maddi vəziyyəti çətin olan 12 mindən çox tələbə hər il maliyyə yardımı alır, 40 mindən çox tələbə isə azaldılmış təhsil haqqından və ya ödənişdən azad olunma imkanından yararlanır.
