ABŞ İranla müharibə fonunda bir sıra Avropa müttəfiqlərinə hərbi texnikanın və raket sistemlərinin tədarükündə mümkün ciddi gecikmələr barədə xəbərdarlıq edib.
“Reuters”-in “Financial Times”-a istinadən yaydığı məlumata görə, xəbərdarlıq Böyük Britaniya, Polşa, Litva və Estoniya da daxil olmaqla bir neçə ölkəyə göndərilib.
Məlumata əsasən, gecikmələr ABŞ-ın son aylarda İranla müharibədə böyük həcmdə silah və sursat istifadə etməsi nəticəsində ehtiyatların azalması ilə əlaqələndirilir. Pentaqon Avropa müttəfiqlərinə HIMARS, NASAMS və digər raket sistemləri üçün sursatların tədarük müddətinin uzana biləcəyini bildirib.
“Financial Times”-ın məlumatında qeyd olunur ki, bəzi silahların Asiya istiqamətində tədarükünün də təxirə salınması müzakirə edilir. ABŞ hərbi ehtiyatlarının azalması Vaşinqtonu mövcud sifarişləri və yeni avadanlıq müraciətlərini yenidən qiymətləndirməyə məcbur edib. Pentaqon isə tərəfdaşlardan gələn tələbləri “əməliyyat ehtiyaclarına uyğunluq” baxımından diqqətlə nəzərdən keçirdiyini açıqlayıb.
Bu vəziyyət Ukraynaya silah tədarükü ilə bağlı narahatlıqları da artırır. Çünki HIMARS və NASAMS sistemləri Ukraynanın Rusiya hücumlarına qarşı müdafiəsində mühüm rol oynayır. “The Kyiv Independent” yazır ki, gecikmələr Ukraynanın hava hücumundan müdafiə və uzaqmənzilli zərbə imkanlarına təsir göstərə bilər.
Mütəxəssislər hesab edirlər ki, İran müharibəsi ABŞ-ın eyni anda Yaxın Şərq, Avropa və Hind-Sakit okean regionundakı öhdəliklərini yerinə yetirmək qabiliyyətinə təzyiqi artırıb. “Reuters”-in şərhində qeyd olunur ki, Vaşinqtonun silah tədarükündə gecikmələr barədə xəbərdarlığı NATO daxilində etimad və müdafiə planlaması ilə bağlı əlavə suallar yaradıb.
Beləliklə, İran müharibəsi yalnız Yaxın Şərqdə deyil, Avropa təhlükəsizlik arxitekturasında da təsir göstərməyə başlayıb. ABŞ müttəfiqləri üçün əsas risk ondan ibarətdir ki, Vaşinqtonun silah ehtiyatlarının azalması həm Avropa ölkələrinin müdafiə planlarını, həm də Ukraynaya davamlı hərbi dəstəyi çətinləşdirə bilər.
