ABŞ Prezidenti Donald Trampın administrasiyasında İrana qarşı növbəti addımlarla bağlı ciddi fikir ayrılıqları yaranıb. Yüksəkvəzifəli rəsmilərin bir qismi hərbi əməliyyatların bərpasını, digərləri diplomatik danışıqları, üçüncü qrup isə iqtisadi təzyiqlərin gücləndirilməsini dəstəkləyir. İsrailin Baş naziri Benyamin Netanyahu isə Vaşinqtonu İrana yenidən zərbələr endirməyə çağırır.
MSNews.az xəbər verir ki, bu barədə noyabrın 6-da “The Wall Street Journal” qəzeti ABŞ rəsmilərinə istinadən məlumat yayıb. Nəşrin yazdığına görə, Trampın müşavirləri İranla müharibənin gələcəyi ilə bağlı üç fərqli yanaşma irəli sürürlər.
Müdafiə naziri Pit Heqset və ABŞ Mərkəzi Komandanlığının (CENTCOM) rəhbəri admiral Bred Kuper genişmiqyaslı hərbi əməliyyatların bərpasını dəstəkləyirlər. Onların fikrincə, İranın nüvə obyektlərinə, enerji infrastrukturuna, raket və pilotsuz uçuş aparatları potensialına yeni zərbələr Tehranın güzəştə getməsinə səbəb ola bilər.
Bunun əksinə olaraq, vitse-prezident Cey Di Vens və prezidentin xüsusi elçisi Stiv Uitkoff müharibənin danışıqlar yolu ilə dayandırılmasının tərəfdarıdırlar. Onlar xüsusilə Hörmüz boğazında gəmiçiliyin bərpasına və İranla diplomatik razılaşmanın əldə edilməsinə üstünlük verirlər.
Dövlət katibi Marko Rubio və maliyyə naziri Skott Bessent isə üçüncü variantı dəstəkləyirlər. Onlar hərbi əməliyyatları genişləndirmədən İrana qarşı iqtisadi sanksiyaların sərtləşdirilməsini və mövcud ticarət blokadasının saxlanılmasını məqsədəuyğun hesab edirlər.
Bu barədə “Iran International” da məlumat yayıb.
İsrailin Baş naziri Benyamin Netanyahu isə İrana qarşı hərbi zərbələrin mümkün qədər tez bərpa olunmasına çalışır. “Financial Times” nəşrinin məlumatına görə, Netanyahu Trampı ABŞ-da aralıq seçkilərindən sonra yeni hücumlara başlamağa çağırıb. Bununla belə, hücumların məhz 11 noyabradək həyata keçirilməsi barədə konkret müddət etibarlı mənbələrdə təsdiqini tapmayıb.
Bu arada, Qətər Vaşinqtonla Tehran arasında vasitəçilik səylərini davam etdirir. Müzakirə olunan variantlardan biri İranın Hörmüz boğazında gəmiçiliyə qoyduğu məhdudiyyətləri aradan qaldırması müqabilində ABŞ-ın blokadanı yumşaltması və nüvə proqramı üzrə danışıqlara başlanmasıdır.
Məlumata görə, Donald Tramp hələlik yekun qərar verməyib. Pentaqon mümkün hərbi əməliyyatlara hazırlığı davam etdirsə də, Ağ Ev diplomatik həll variantını da gündəmdə saxlayır.
