Suriya Türkiyə, Səudiyyə Ərəbistanı və Pakistanın daxil olduğu Məkkə müdafiə alyansına qoşulmaq imkanını nəzərdən keçirir. Dəməşq regional təhlükəsizlik və birgə müdafiə sahəsində əməkdaşlığın genişləndirilməsi üçün danışıqlar aparır.
MSNews.az xəbər verir ki, bu barədə Suriyanın xarici işlər naziri Əsəd əş-Şeybani oktyabrın 31-də Bəhreyndə keçirilən Manama Dialoqu təhlükəsizlik forumunda çıxışı zamanı bildirib.
Məlumatı “Anadolu Agentliyi” yayıb.
“Suriyanın Məkkə alyansına qoşulması imkanını qiymətləndirmək üçün danışıqlar hazırda davam edir”, – nazir vurğulayıb.
Əş-Şeybani Suriyanın regional təhlükəsizlik sisteminin ayrılmaz hissəsi olduğunu bildirərək bölgədə sabitliyi qorumağa yönəlmiş təşəbbüsləri dəstəklədiklərini qeyd edib. Onun sözlərinə görə, regionun birgə müdafiə və çəkindirmə mexanizmlərinə ehtiyacı əvvəlkindən daha çoxdur.
“Al Jazeera” nəşrinin məlumatına görə, Məkkə Birgə Müdafiə Sazişi 2026-cı ilin avqustunda Türkiyə, Səudiyyə Ərəbistanı və Pakistan arasında imzalanıb. Razılaşmaya əsasən, üzv dövlətlərdən birinə silahlı hücum bütün tərəflərə qarşı hücum kimi qiymətləndirilir.
Suriya xarici işlər naziri çıxışında Körfəz ölkələrinin təhlükəsizliyinə də toxunaraq Dəməşqin region dövlətlərinin suverenliyini və ərazi bütövlüyünü dəstəklədiyini bildirib.
Bununla belə, Suriyanın alyansa qoşulması barədə yekun qərar qəbul edilməyib. Məsələ hələlik müzakirə və qiymətləndirmə mərhələsindədir.
