İsveçrə Şimali Koreyanın paytaxtı Pxenyanda diplomatik nümayəndəliyinin fəaliyyətini rəsmən bərpa edib. Bernin bu addımı iki ölkə arasında daimi diplomatik təmasların gücləndirilməsinə və Koreya yarımadasında təhlükəsizlik məsələləri üzrə siyasi dialoqun inkişafına yönəlib.
MSNews.az xəbər verir ki, İsveçrənin xarici işlər naziri İnyatsio Kassis oktyabrın 29-da Pxenyanda diplomatik ofisin rəsmi açılış mərasimində iştirak edib.
Kassis açılışı Şimali Koreya ilə birbaşa dialoqun gücləndirilməsi istiqamətində konkret addım adlandırıb.
İsveçrənin Pxenyandakı nümayəndəliyi 2020-ci ilin martında COVID-19 pandemiyası səbəbindən fəaliyyətini dayandırmışdı.
Yeni diplomatik ofis 2026-cı il oktyabrın 19-dan fəaliyyət göstərməyə başlayıb, rəsmi açılış mərasimi isə daha sonra keçirilib.
Nümayəndəlik İsveçrənin Pekindəki səfirliyinə tabedir. Şimali Koreya ilə diplomatik və konsulluq münasibətlərinin idarə olunmasına həmin səfirlik cavabdeh olaraq qalır.
İsveçrənin xarici işlər naziri açılış münasibətilə verdiyi açıqlamada Şimali Koreya ilə siyasi əlaqələrin inkişaf etdirilməsinin əhəmiyyətini vurğulayıb.
“Dialoq regionda sülh və sabitliyin təmin olunması üçün vacib olaraq qalır”, – deyə Kassis bildirib.
İsveçrə hökumətinin məlumatına görə, diplomatik təmasların əsas mövzularına Koreya yarımadasındakı təhlükəsizlik vəziyyəti, iki ölkənin xarici işlər nazirlikləri arasında məsləhətləşmələrin bərpası və beynəlxalq geosiyasi məsələlər daxildir.
Kassisin Şimali Koreyanın xarici işlər naziri Çve Son Hi və hakim Koreya Əmək Partiyasının nümayəndələri ilə görüşləri də nəzərdə tutulub.
İsveçrə Şimali Koreya ilə diplomatik münasibətlərini 1974-cü ildə qurub.
Bununla yanaşı, Bern 1953-cü ildən Koreya yarımadasında atəşkəs rejiminə nəzarət edən Neytral Dövlətlərin Nəzarət Komissiyasının fəaliyyətində iştirak edir.
İsveçrə daha əvvəl də Koreya yarımadasındakı gərginliyin azaldılması məqsədilə müxtəlif diplomatik danışıqlara ev sahibliyi edib.
Ölkə neytral dövlət kimi Şimali Koreya ilə digər beynəlxalq tərəfdaşlar arasında dialoqun inkişafına töhfə verməyə çalışır.
Son illərdə Şimali Koreyanın nüvə və ballistik raket proqramları səbəbindən Qərb dövlətləri ilə münasibətlərində ciddi fikir ayrılıqları davam edir.
“Reuters”in məlumatına görə, Avropa İttifaqı Pxenyanla birbaşa siyasi dialoqu böyük ölçüdə dondurduğu halda, İsveçrə əlaqələrin bərpası istiqamətində addımlar atır.
Bununla belə, İsveçrənin diplomatik nümayəndəliyini yenidən açması Şimali Koreyaya qarşı sanksiyaların yumşaldılması demək deyil.
Bern BMT Təhlükəsizlik Şurasının Şimali Koreyanın nüvə və raket proqramları ilə bağlı tətbiq etdiyi sanksiyalara əməl etməyə davam etdiyini vurğulayıb.
İsveçrənin əsas məqsədi diplomatik kommunikasiya kanallarını açıq saxlamaq və Koreya yarımadasında sülhün qorunmasına töhfə verməkdir.
