İsrailin Baş naziri Benyamin Netanyahu ilə ölkənin Baş Qərargah rəisi Eyal Zamir arasında İrana qarşı mümkün hərbi əməliyyatla bağlı ciddi fikir ayrılığı yarandığı bildirilir. İsrail mediasının məlumatına görə, Netanyahu hərbi hazırlığın sürətləndirilməsini istəyir, Zamir isə seçkilər ərəfəsində yeni qarşıdurmanın təhlükəli nəticələr doğura biləcəyindən narahatdır.
MSNews.az xəbər verir ki, bu barədə İsrailin 12-ci kanalı təhlükəsizlik qurumlarındakı mənbələrə istinadən məlumat yayıb. Telekanalın xəbəri hərbi senzuranın müəyyən etdiyi məhdudiyyətlər çərçivəsində dərc olunub.
Məlumata əsasən, Netanyahu hərbi rəhbərliyə İranla qarşıdurmaya səbəb ola biləcək əməliyyatın hazırlanması barədə göstəriş verib. Lakin Baş Qərargah rəisi Eyal Zamir belə bir addımın zəruriliyini şübhə altına alaraq əlavə müzakirələr aparılmasını və əməliyyat üçün yazılı hüquqi səlahiyyət təqdim edilməsini istəyib.
İsrailin hərbi dairələrində əsas narahatlıq mümkün əməliyyatın nəzarətdən çıxaraq İranla yeni genişmiqyaslı müharibəyə səbəb olmasıdır.
Mənbələr hesab edirlər ki, oktyabrın 27-də keçirilən parlament seçkiləri ərəfəsində belə bir addımın atılması siyasi nəticələr də doğura bilər.
12-ci kanalın məlumatına görə, təhlükəsizlik qurumlarının bəzi nümayəndələri İranla bağlı hərbi gərginliyin daxili siyasi məqsədlər üçün istifadə oluna biləcəyindən narahatdırlar.
Netanyahu isə Baş Qərargah rəisi ilə qarşıdurma yaşandığı barədə məlumatları təkzib edib. O, 14-cü kanala müsahibəsində aralarında münaqişə olmadığını bildirib. Müdafiə naziri İsrael Kats da seçkilərdən əvvəl İrana hücum planlaşdırıldığı iddialarını rədd edib.
Tramp Netanyahunun hücum təklifini qəbul etməyib
ABŞ-nin “CNN” telekanalının məlumatına görə, Netanyahu İsraildəki seçkilərdən əvvəl ABŞ ilə birlikdə İrana zərbə endirilməsinə çalışıb.
Lakin Donald Tramp administrasiyası belə bir əməliyyat üçün razılıq verməyərək İsraildən gözləməyi istəyib.
Telekanalın istinad etdiyi israilli təhlükəsizlik mənbəsi bildirib ki, Netanyahu Trampı seçkilərdən əvvəl birgə hücuma razı salmağa çalışsa da, ABŞ Prezidenti buna razılıq verməyib.
Mənbələrdən birinin sözlərinə görə, Trampın mövqeyinə təsir edən amillərdən biri Eyal Zamirin xəbərdarlığı olub.
Zamir ABŞ Birləşmiş Qərargah Rəisləri Komitəsinin sədri general Den Keynlə telefon danışığında İrana yeni hücumun İsrail seçkilərinin təxirə salınmasına səbəb ola biləcəyini bildirib.
İsrailin hərbi rəhbərliyi İranın mümkün cavab zərbələrinin ölkədə təhlükəsizlik vəziyyətini kəskinləşdirə biləcəyindən narahatdır.
Bununla belə, Netanyahunun ofisi “CNN”in hücum planları barədə məlumatını da həqiqətə uyğun olmayan xəbər adlandırıb.
Trampın Netanyahuya dəstəyi də gündəmə gəlib
ABŞ-nin “Axios” nəşrinin jurnalisti Barak Ravid Trampın seçkilər ərəfəsində Netanyahuya verdiyi açıq siyasi dəstək barədə məlumat yayıb.
Tramp oktyabrın 18-də Netanyahuya səs verilməsinə çağırış edib və onunla münasibətlərini yüksək qiymətləndirib.
ABŞ Prezidenti bu dəstəyi iki ölkənin İranla bağlı əməkdaşlığı ilə də əlaqələndirib.
“Axios”un məlumatına görə, Netanyahu ilə Tramp arasında İrana qarşı yeni hərbi əməliyyatın mümkün vaxtı barədə əvvəlcədən də müzakirələr aparılıb. Lakin Ağ Ev həmin danışıqlara dair bəzi iddiaları təkzib edib.
Baş Qərargah rəisinin gələcəyi də müzakirə olunur
İsrailin 12-ci kanalının oktyabrın 26-da yaydığı digər məlumata görə, Netanyahu yenidən hökumət quracağı təqdirdə Eyal Zamirin vəzifədən uzaqlaşdırılmasını nəzərdən keçirə bilər.
Telekanal tərəflər arasındakı fikir ayrılığının dərinləşdiyini iddia edib. Baş nazirin ofisi isə bu xəbəri də təkzib edib.
Hazırda İsrailin İrana qarşı yeni hücum qərarı qəbul etdiyi rəsmi şəkildə təsdiqlənməyib. Hərbi hazırlıqlar və mümkün əməliyyatın vaxtı barədə yayılan məlumatların böyük hissəsi anonim təhlükəsizlik mənbələrinə əsaslanır.
