Ukrayna Qara dəniz üzərindən ixracın məhdudlaşması və liman infrastrukturuna hücumlar səbəbindən hər gün təxminən 60 milyon avro ixrac gəlirindən məhrum olur. Bu barədə Avropa İttifaqının xarici siyasət və təhlükəsizlik üzrə ali nümayəndəsi Kaya Kallas açıqlama verib.
MSNews.az xəbər verir ki, Kallas oktyabrın 20-də Strasburqda Avropa Parlamentinin plenar iclasında çıxışı zamanı Qara dənizdə təhlükəsizlik vəziyyətinin pisləşməsinə diqqət çəkib.
Onun sözlərinə görə, iyulun ortalarından etibarən Ukraynanın ixrac marşrutlarına qarşı hücumların intensivləşməsi ölkənin xarici ticarətinə ciddi zərbə vurub.
“Ukrayna hər gün təxminən 60 milyon avro ixrac gəlirini itirir”, – deyə Aİ diplomatiyasının rəhbəri bildirib.
Kallas vurğulayıb ki, Ukrayna dünya bazarlarında mühüm kənd təsərrüfatı məhsulları tədarükçülərindən biridir. Onun təqdim etdiyi göstəricilərə əsasən, ölkə qlobal qarğıdalı ixracının 15 faizini, buğda ixracının 10 faizini, arpa ixracının 15–20 faizini və günəbaxan yağı ixracının təxminən yarısını təmin edir.
Kallasın sözlərinə görə, bu məhsulların təxminən 90 faizi beynəlxalq bazarlara Qara dəniz dəhlizi vasitəsilə daşınır.
Avropa İttifaqının xarici siyasət rəhbəri Ukraynanın limanlarına, kənd təsərrüfatı infrastrukturuna və nəqliyyat marşrutlarına edilən hücumların yalnız ölkə iqtisadiyyatına deyil, beynəlxalq ərzaq təhlükəsizliyinə də mənfi təsir göstərdiyini bildirib.
O, xüsusilə Afrika və Asiyada ərzaq idxalından asılı olan ölkələrin belə fasilələrdən zərər görə biləcəyinə diqqət çəkib.
Kallas Qara dənizdə son vaxtlar mülki gəmilərə qarşı hücumların artmasından da narahatlığını ifadə edib. O, Rumıniya sahilləri yaxınlığında tankerlərə edilən hücumları təhlükəli eskalasiya kimi qiymətləndirib.
Avropa İttifaqı Qara dənizdə mülki gəmiçiliyin təhlükəsizliyinin və sərbəst hərəkətin təmin edilməsinə çağırıb.
Kallas Rusiyaya təzyiqin gücləndirilməsinin və dənizdə hücumların dayandırılmasının zəruri olduğunu bildirib.
Qeyd edək ki, iyul ayında Ukraynanın kənd təsərrüfatı təşkilatları Rusiya hücumları nəticəsində Qara dəniz limanlarının taxıl ixracı imkanlarının təxminən üçdəbir azaldığını açıqlamışdı.
