Azərbaycan Prezidenti İlham Əliyev sentyabrın 25-də Tacikistanın Baş naziri Koxir Rasulzodanı qəbul edib. Görüşdə iki ölkə arasında ticarət-iqtisadi əməkdaşlığın genişləndirilməsi, nəqliyyat-logistika imkanları, Orta Dəhliz və Bakı ilə Düşənbə arasında birbaşa aviareysin əhəmiyyəti müzakirə olunub.
MSNews.az xəbər verir ki, Prezident İlham Əliyev Azərbaycan və Tacikistanı dost və qardaş ölkələr adlandıraraq ikitərəfli əməkdaşlığın daha da inkişaf etdirilməsi üçün geniş potensialın olduğunu bildirib. Dövlət başçısı qarşılıqlı səfərlərin əlaqələrin genişlənməsində mühüm rol oynadığını vurğulayıb.
Koxir Rasulzoda Tacikistan Prezidenti Emoməli Rəhmonun salamlarını və xoş arzularını Azərbaycan Prezidentinə çatdırıb. İlham Əliyev də öz salamlarını Tacikistan liderinə çatdırmağı xahiş edib.
Tacikistanın Baş naziri iki ölkə arasında strateji tərəfdaşlıq münasibətlərinin yeni inkişaf mərhələsinə qədəm qoyduğunu bildirib. Görüşdə 2024-cü ildə Bakıda İlham Əliyev və Emoməli Rəhmon tərəfindən imzalanmış “Azərbaycan Respublikası ilə Tacikistan Respublikası arasında strateji tərəfdaşlıq haqqında Bəyannamə” də xatırlanıb. Həmin sənəd 2024-cü il mayın 23-də imzalanıb.
Tərəflər Tacikistan məhsullarının Azərbaycan ərazisindən və Orta Dəhliz vasitəsilə beynəlxalq bazarlara çıxarılması imkanlarını, həmçinin metallurgiya, energetika və kənd təsərrüfatı sahələrində əməkdaşlığı müzakirə ediblər.
Koxir Rasulzoda Azərbaycanın “ASAN xidmət” modelinin Tacikistanda tətbiqinə maraq göstərdiklərini də bildirib.
Görüşdə humanitar və təhsil əlaqələrinə də toxunulub. Tacikistanın Baş naziri tacikistanlı tələbələr üçün Azərbaycan tərəfindən ayrılan təhsil kvotalarına görə təşəkkür edib. Mədəniyyət, humanitar və idman sahələrində qarşılıqlı tədbirlərin davam etdirilməsinin vacibliyi vurğulanıb.
Azərbaycan və Tacikistanın turizm potensialı nəzərə alınaraq Bakı ilə Düşənbə arasında birbaşa aviareysin açılmasının əhəmiyyəti də qeyd edilib. Tərəflər turizm və sərnişindaşıma sahəsində artımı müsbət qiymətləndiriblər.
“Report”un məlumatına görə, Rasulzoda sentyabrın 25-də Azərbaycana rəsmi səfərə gəlib və Heydər Əliyev Beynəlxalq Aeroportunda Azərbaycan rəsmiləri tərəfindən qarşılanıb.
