Sudan ordusu və ona müttəfiq qüvvələr Çevik Dəstək Qüvvələri (ÇDQ) ilə şiddətli döyüşlərdən sonra Şimali Kordofan ştatında 11 ərazini nəzarətə götürdüklərini açıqlayıblar. Hökumət qüvvələrinin ştatın paytaxtı Əl-Ubəyyiddən qərbə doğru irəlilədiyi bildirilir.
MSNews.az xəbər verir ki, bu barədə “Sudan Tribune” nəşri Sudan Silahlı Qüvvələrinin sentyabrın 17-də yaydığı bəyanata istinadən məlumat verib.
Ordunun açıqlamasına əsasən, hərbi əməliyyatlar nəticəsində Kajmar, Şarşar, Əl-Quleyat, Əvlad Hazma və digər yaşayış məntəqələri, həmçinin Əl-Məzrub ətrafındakı ərazilər hökumət qüvvələrinin nəzarətinə keçib.
Sudan ordusu döyüşlər zamanı CDQ-yə ağır itkilər verdirdiyini və geri çəkilən silahlı dəstələri Darfur sərhədinə doğru təqib etdiyini bildirib. Əl-Ubəyyid şəhərindən qərbdə isə ərazilərin yoxlanılması və nəzarətin möhkəmləndirilməsi əməliyyatları davam etdirilir.
Məlumata görə, hökumət qüvvələri hücumlarını Şimali Kordofanın qərbində yerləşən Sodari və Hamrat əş-Şeyx istiqamətlərində genişləndiriblər. Sentyabrın 19-da ordu bölmələrinin Sodarinin şimal-şərqində yerləşən strateji Əl-Cəmamə ərazisini də nəzarətə götürdüyü bildirilib.
Sudan ordusuna müttəfiq qüvvələrin nümayəndələri əməliyyatlar zamanı ÇDQ-nə məxsus çoxsaylı hərbi texnikanın məhv edildiyini və ələ keçirildiyini də açıqlayıblar. Bununla belə, texnika itkilərinin dəqiq sayı müstəqil mənbələr tərəfindən təsdiqlənməyib.
Şimali Kordofan uğrunda döyüşlər Sudan ordusu ilə ÇDQ arasında 2023-cü ilin aprelindən davam edən vətəndaş müharibəsinin əsas cəbhələrindən biridir. Bölgə paytaxt Xartumla Darfur arasında mühüm nəqliyyat və təchizat yollarının üzərində yerləşir.
Qeyd edək ki, Sudan ordusunun 11 ərazini nəzarətə götürməsi barədə açıqlaması hələlik müstəqil şəkildə tam təsdiqlənməyib.ÇDQ-nin sözügedən ərazilərdəki son vəziyyətlə bağlı rəsmi mövqeyi də məlum deyil.
