Fransada yanacaq təchizatı ilə bağlı problemlər dərinləşir. Sentyabrın 18-nə olan rəsmi məlumatlara əsasən, ölkədəki yanacaqdoldurma məntəqələrinin 11 faizində benzin və ya dizel yanacağından ən azı biri tükənib. Yanacağın rekord həddə yaxınlaşan qiymətləri fonunda Prezident Emmanuel Makron yaranmış vəziyyətlə bağlı təcili müşavirə keçirib.
MSNews.az xəbər verir ki, bu barədə “The Connexion” nəşri Fransa hökumətinin açıqladığı məlumatlara istinadən xəbər yayıb.
Rəsmi statistikaya görə, sentyabrın 16-da yanacaq çatışmazlığı yaşayan məntəqələrin payı 9 faiz olduğu halda, sentyabrın 18-də bu göstərici 11 faizə yüksəlib. Ən ciddi təchizat problemləri ölkənin şərqində yerləşən Qrand-Est regionunda qeydə alınıb. Burada məntəqələrin 16 faizində yanacaq çatışmazlığı müşahidə olunur.
Yanacaq qıtlığı qiymət artımı ilə müşayiət olunur. Sentyabrın 18-də dizel yanacağının orta qiyməti bir litr üçün təxminən 2,38 avroya çataraq əvvəlki rekord göstəriciyə yaxınlaşıb. Benzinin qiyməti də yüksək səviyyədə qalır.
Fransa Prezidenti Emmanuel Makron sentyabrın 18-də siyasi partiyaların rəhbərləri ilə görüş keçirərək Yaxın Şərqdəki müharibənin ölkənin enerji təchizatına və iqtisadiyyatına təsirini müzakirə edib.
Yelisey Sarayının açıqlamasına əsasən, hökumətə yanacaq idxalının və daxili istehsalın təhlükəsizliyini təmin etmək, logistika imkanlarını gücləndirmək və qiymət artımından təsirlənən vətəndaşlara dəstəyi davam etdirmək tapşırılıb.
Hökumət xüsusilə iş fəaliyyəti ilə əlaqədar uzun məsafələr qət edən sürücülər üçün maliyyə yardımı proqramının müddətini sentyabrın 30-dək uzadıb. Kənd təsərrüfatı və balıqçılıq kimi yanacaq xərclərindən daha çox asılı olan sahələrə dəstək tədbirlərinin də davam etdirilməsi nəzərdə tutulur.
Qeyd edək ki, hökumət yanacaq təchizatındakı çətinliklərin bir hissəsini qiymətləri məhdudlaşdıran məntəqələrə tələbatın artması və logistika problemləri ilə əlaqələndirir. Rəsmi məlumatlara görə, təchizat problemi yaşayan məntəqələrin təxminən 90 faizi “TotalEnergies” şəbəkəsinə aiddir.
