Ukrayna Ali Radasının deputatı Olqa Vasilevskaya-Smaqlük ölkə büdcəsində vəsaitin ciddi şəkildə azaldığını və sentyabrın 15-dən maliyyələşmənin əsasən üç prioritet istiqamətə yönəldildiyini bildirib. Bununla belə, Ukraynanın maliyyə naziri Sergey Marçenko digər bütün büdcə xərclərinin tam dayandırılması barədə məlumatı təkzib edib.
MSNews.az xəbər verir ki, Ali Radanın Maliyyə, Vergi və Gömrük Siyasəti Komitəsinin üzvü Vasilevskaya-Smaqlük “Telegram” kanalında sosial xərclərin, büdcə işçilərinin əməkhaqlarının və hərbçilərin təminatının hazırda əsas prioritet olduğunu yazıb.
“Bu gündən Ukraynada yalnız sosial xərclər, büdcə işçilərinin əməkhaqları və hərbçilərin təminatı maliyyələşdirilir. Büdcədə pul çox azdır”, – deputatın sözlərini “Ukrainskiye Novosti” sitat gətirir.
Vasilevskaya-Smaqlük büdcə vəziyyətini beynəlxalq maliyyə yardımının alınması üçün Kiyevin yerinə yetirməli olduğu bir sıra qanunvericilik öhdəlikləri ilə də əlaqələndirib. Onun sözlərinə görə, parlamentin yaxın günlərdə qəbul edəcəyi qərarlar yeni xarici maliyyə tranşlarının əldə edilməsinə təsir göstərə bilər.
Lakin sentyabrın 16-da maliyyə naziri Sergey Marçenko deputatın açıqlamasının ən sərt hissəsini təkzib edib. “Focus” yazır ki, Marçenko parlament komitəsinin iclasında digər bütün dövlət xərclərinin dayandırılması barədə məlumatın “həqiqətə uyğun olmadığını” bildirib.
Bununla belə, Ukraynanın maliyyə vəziyyətinin ciddi təzyiq altında olduğu rəsmi səviyyədə də etiraf edilir. Maliyyə naziri daha əvvəl “Euronews”-a bildirmişdi ki, ölkə 2022-ci ildən bəri ən sərt büdcə məhdudiyyətləri ilə üzləşib və əlavə xarici maliyyə təmin olunmazsa, qeyri-hərbi xərclərin azaldılması zərurəti yarana bilər.
“Reuters” isə sentyabrın 16-da Ukraynanın 2026-cı il üçün əlavə müdafiə xərclərində təxminən 27 milyard dollarlıq maliyyələşdirilməmiş ehtiyacının qaldığını bildirib. Kiyev 2027-ci ildə də büdcə kəsirini bağlamaq üçün 52 milyard dollardan çox xarici maliyyə dəstəyinə ehtiyac duyacağını hesablayır.
