Serbiya Prezidenti Aleksandar Vuçiç sentyabrın 25 və ya 26-da dövlət başçısı vəzifəsindən istefa verəcəyini açıqlayıb. Hakim Serbiya Tərəqqi Partiyası (SNS) isə onu qarşıdan gələn parlament seçkilərində qələbə qazanacağı təqdirdə baş nazir postuna namizəd göstərib.
MSNews.az xəbər verir ki, Vuçiç jurnalistlərin sualını cavablandırarkən istefasını BMT Baş Assambleyası çərçivəsində Nyu-Yorka səfərindən sonraya planlaşdırdığını bildirib.
“Nyu-Yorkdan qayıdan kimi istefa verəcəyəm. Bu, sentyabrın 25-i və ya 26-sı olacaq. Vəssalam”, — deyə Vuçiç bildirib.
Vuçiç daha əvvəl də dövlət səfərləri və BMT-dəki çıxışı başa çatdıqdan sonra prezident postundan gedəcəyini və seçki kampaniyasını “adi vətəndaş” kimi aparacağını açıqlamışdı. Hakim SNS-in rəsmi saytında da onun Nyu-York səfərindən qayıtdıqdan sonra istefa verməyi planlaşdırdığı qeyd olunur.
Serbiyada siyasi proses sentyabrın 9-da yeni mərhələyə keçib. Vuçiç həmin gün Milli Assambleyanın buraxılması haqqında fərman imzalayıb və növbədənkənar parlament seçkilərini 25 oktyabr 2026-cı ilə təyin edib.
“Reuters” bildirir ki, hakim partiya Vuçiçi gələcək hökumətin başçısı vəzifəsinə namizəd göstərib. Beləliklə, 2017-ci ildən prezident olan Vuçiç parlament seçkilərində hakim blok qalib gələrsə, yenidən icra hakimiyyətinin başına — bu dəfə baş nazir kimi qayıda bilər.
Vuçiç 2014–2017-ci illərdə artıq Serbiyanın baş naziri olub. O, hazırda ikinci prezidentlik müddətini başa vurur və mövcud konstitusiya qaydalarına görə üçüncü dəfə ardıcıl prezident seçilə bilməz.
Prezident istefa verdikdən sonra Serbiya qanunvericiliyinə əsasən onun səlahiyyətlərini müvəqqəti olaraq parlament sədri həyata keçirəcək və ayrıca prezident seçkisi keçirilməlidir. “N1” bildirir ki, dövlət başçısının mandatı yazılı istefanın parlamentə çatdığı anda başa çatır.
Növbədənkənar seçkilər Serbiyada təxminən iki ildir davam edən kütləvi hökumət əleyhinə etirazlar fonunda keçiriləcək. Etirazlar 2024-cü ilin noyabrında Novi Sad dəmiryol vağzalında konstruksiyanın uçması nəticəsində 16 nəfərin həlak olmasından sonra genişlənib. Müxalifət və tələbə hərəkatları hökuməti korrupsiya və demokratik institutların zəiflədilməsində ittiham edir, Vuçiç və hakimiyyət isə bu ittihamları rədd edir.
