Azərbaycanın “e-gov.az” Elektron Hökumət Portalı 10 sentyabr 2026-cı ildən etibarən fəaliyyətini dayandırır, portalda təqdim edilən elektron dövlət xidmətləri isə “myGov” platformasına köçürülür.
MSNews.az xəbər verir ki, “myGov” istifadəçilərə daha əvvəl bununla bağlı bildiriş göndərib. Məlumata görə, dəyişiklik dövlət elektron xidmətlərinin vahid platformada cəmləşdirilməsi və vətəndaşlara daha müasir rəqəmsal xidmət mühitinin təqdim olunması məqsədi daşıyır.
Hazırda “myGov” Azərbaycanın rəsmi rəqəmsal hökumət platforması kimi fəaliyyət göstərir. Platformada vətəndaşlar şəxsi, ailə, əmək, maliyyə, təhsil, tibb və nəqliyyat məlumatlarına çıxış əldə edə, müxtəlif dövlət xidmətlərindən istifadə edə və sənədlərini rəqəmsal formada idarə edə bilirlər.
“myGov”un rəsmi məlumatında platforma hökumətlə vətəndaş arasında vahid rəqəmsal əlaqə nöqtəsi kimi təqdim olunur və dövlət xidmətləri ilə vacib sənədlərə onlayn çıxışı təmin etdiyi bildirilir.
“e-gov.az” isə Azərbaycanda elektron dövlət xidmətlərinin “bir pəncərə” prinsipi üzrə təqdim edilməsi üçün yaradılmış ilk əsas platformalardan biri olub. Prezidentin rəsmi saytında dərc olunan sənədlərdə vahid Elektron Hökumət Portalının dövlət qurumlarının elektron xidmətlərini bir mərkəzdə toplamaq məqsədilə yaradıldığı qeyd edilir.
Qeyd edək ki, məlumatda portalın fəaliyyətinin dayandırılması üçün açıqlanan tarix 10 sentyabr 2026-cı ildir.
