Braziliyalı qaçışçı Valdemar Bispo Sousa Filyo, daha çox Valdemar Boro kimi tanınan idmançı, 11 sponsorunun hər birinə ayrıca görünürlük qazandırmaq üçün mükafatlandırma mərasiminə 11 köynəyi üst-üstə geyinərək çıxıb. Onun köynəkləri bir-bir çıxarıb hər sponsorla ayrıca foto çəkdirməsi sosial şəbəkələrdə viral olub.
MSNews.az xəbər verir ki, hadisə avqustun 30-da Braziliyanın Baiya ştatının Xakobina şəhərində keçirilən 39-cu “Corrida Duque de Caxias” qaçış yarışında baş verib. Yarışda 2 mindən çox peşəkar və həvəskar idmançı iştirak edib, proqramda 5 və 10 kilometrlik məsafələr yer alıb.
Bu barədə “Jacobina 24 Horas” məlumat yayıb.
Sosial mediada yayılan bəzi paylaşımlarda Valdemarın ilk üçlükdə finişə çatdığı qeyd edilsə də, bu məlumat dəqiq deyil. “R7 Esportes” və digər mənbələr onun yarışda beşinci yeri tutduğunu bildirir. İdmançı məhz bundan sonra mükafatlandırma zonasına 11 sponsor köynəyi ilə çıxıb.
Valdemar köynəkləri bir-birinin üzərindən çıxararaq hər dəfə fərqli sponsorun loqosunu kameralar qarşısında nümayiş etdirib. Beləliklə, hər bir şirkət üçün ayrıca foto və görüntü əldə olunub. “Mercado Negro” yazır ki, idmançının sponsorları arasında avtomobil, maliyyə, qida və digər yerli bizneslər yer alıb.
Görüntülər qısa müddətdə Braziliyadan kənarda da yayılıb və Valdemarın addımı yaradıcı idman marketinqi nümunəsi kimi müzakirə olunmağa başlayıb. Onun bir köynəkdə 11 kiçik loqo yerləşdirmək əvəzinə hər sponsor üçün ayrıca geyim seçməsi markalara daha çox diqqət qazandırıb.
Yarışın özündə 10 kilometrlik kişilər kateqoriyasının qalibi 29 dəqiqə 17 saniyə nəticə göstərən Qleison da Silva Santos olub. “Jacobina.blog” məlumatına görə, tədbir şəhərin ənənəvi idman yarışlarından biri hesab olunur.
