Ukrayna Prezidenti Volodimir Zelenski Norveçin Baş naziri Yonas Qar Störe ilə Osloda keçirdiyi görüşdə ölkəsinin hava hücumundan müdafiəsinin gücləndirilməsi və qarşıdakı qış mövsümünə hazırlıq üçün Norveçin dəstəyini müzakirə edib.
MSNews.az xəbər verir ki, görüş sentyabrın 8-də Zelenskinin Norveçə səfəri çərçivəsində keçirilib. Ukrayna lideri avqustun 28-də 89 yaşında vəfat edən Norveç Kralı V Haraldın ölümü ilə əlaqədar başsağlığı verib və sentyabrın 9-da keçiriləcək vida mərasimində iştirakının onun üçün vacib olduğunu bildirib.
Ukrayna Prezidentinin Ofisi bildirir ki, danışıqların əsas mövzularından biri Ukraynanın hava hücumundan müdafiəsi olub. Zelenski ilk növbədə “Patriot” sistemləri üçün tutucu raketlərə ehtiyac olduğunu vurğulayıb. Kiyev Norveçin bu istiqamətdə, o cümlədən PURL mexanizmi vasitəsilə dəstəyinə ümid edir.
Tərəflər eyni zamanda FREYJA antiballistik müdafiə proqramının gələcək inkişafını müzakirə ediblər. İyulda təqdim edilən bu təşəbbüs Danimarka, Fransa, Almaniya, İtaliya, Niderland, Norveç, İspaniya, İsveç, Ukrayna və Böyük Britaniyanın iştirakı ilə Avropada inteqrasiya olunmuş ballistik raketdən müdafiə imkanlarının yaradılmasını nəzərdə tutur.
Görüşdə Ukraynanın qışa hazırlığına ayrıca diqqət ayrılıb. Zelenski və Störe ölkənin enerji sisteminin ehtiyaclarını və Norveçin 2026–2027-ci ilin qış mövsümündə göstərə biləcəyi yardımı müzakirə ediblər. Norveç hökuməti son aylarda Ukraynanın enerji infrastrukturunun bərpası və dayanıqlığının artırılması üçün əlavə maliyyə ayırıb. Məsələn, 2026-cı il üçün enerji təhlükəsizliyinə təxminən 4,8 milyard Norveç kronu ayrılması nəzərdə tutulub.
Norveç Hökuməti Störenin görüşdən sonra Ukraynanı “ağır qışın” gözlədiyini bildirdiyini yazıb. Baş nazir son aylarda Ukraynanın yaşayış məntəqələri və kritik infrastrukturu üzərinə raket və PUA hücumlarının artdığını vurğulayaraq Norveçin həm hərbi, həm də mülki dəstəyi davam etdirəcəyini deyib.
Görüşdən sonra Zelenski və Störe Avropa müdafiə sənayesinin nümayəndələri ilə də görüşərək ballistik raketlərdən müdafiə sistemlərinin inkişafını müzakirə ediblər. Störe Avropa ölkələrinin həm Ukraynanın, həm də öz müdafiə qabiliyyətlərinin gücləndirilməsi üçün daha sıx və uzunmüddətli əməkdaşlığa ehtiyac olduğunu vurğulayıb.
“Reuters” qeyd edir ki, Zelenskinin Norveçə səfəri Rusiya tərəfindən Ukrayna şəhərlərinə raket və PUA hücumlarının yenidən intensivləşdiyi dövrə təsadüf edir. Ukrayna lideri Oslo danışıqlarında hava hücumundan müdafiə və qışa hazırlığın əsas prioritetlərdən olduğunu açıqlayıb.
