Avropa Komissiyasının prezidenti Ursula fon der Lyayen Qrenlandiyanın gələcəyi ilə bağlı qərarı yalnız ada sakinləri və Danimarkanın verməli olduğunu bəyan edib və Avropa İttifaqının onların yanında dayanacağını vurğulayıb.
MSNews.az xəbər verir ki, fon der Lyayen Qrenlandiyanın paytaxtı Nuuk şəhərinə səfəri zamanı Danimarkanın Baş naziri Mette Frederiksen və Qrenlandiyanın Baş naziri Yens-Frederik Nielsenlə görüşüb. Səfər çərçivəsində Aİ ilə Qrenlandiya arasında əməkdaşlığın genişləndirilməsi barədə birgə bəyannamə də imzalanıb.
Bu barədə Avropa Komissiyası məlumat yayıb.
Fon der Lyayen Aİ-nin Danimarka Krallığı və Qrenlandiya xalqı ilə tam həmrəy olduğunu bildirib. O, ərazi bütövlüyü, dövlətlərin suverenliyi və sərhədlərin toxunulmazlığının beynəlxalq hüququn fundamental prinsipləri olduğunu vurğulayıb. “Reuters”in məlumatına görə, Avropa Komissiyasının rəhbəri Qrenlandiyanın gələcəyinə “başqa heç kimin” qərar verməməli olduğunu xüsusi qeyd edib.
Açıqlama ABŞ Prezidenti Donald Trampın Qrenlandiyanın ABŞ-ın nəzarətinə keçməli olduğu barədə təkrar bəyanatları fonunda səsləndirilib. Qrenlandiya və Danimarka rəhbərliyi Vaşinqtonun bu mövqeyini dəfələrlə rədd edib. “Associated Press” bildirir ki, fon der Lyayenin Nuuk səfəri məhz artan geosiyasi təzyiq fonunda Aİ-nin Qrenlandiyaya siyasi və iqtisadi dəstəyini nümayiş etdirmək məqsədi daşıyır.
Fon der Lyayen Arktikanın böyük güclər arasında strateji rəqabətin əsas bölgələrindən birinə çevrildiyini də qeyd edib. Onun sözlərinə görə, burada baş verən proseslər Avropanın təhlükəsizlik və iqtisadi maraqlarına birbaşa təsir göstərir.
Bu səbəbdən Avropa Komissiyası Aİ-nin Arktika üzrə yeni strategiyasını hazırlayır. Sənədin bu payız təqdim olunması və burada Arktikanın gələcəyi, təhlükəsizlik, investisiyalar və Avropanın şimal qonşuları ilə əməkdaşlığın gücləndirilməsi üzrə prioritetlərin müəyyənləşdirilməsi gözlənilir.
Brüssel eyni zamanda Qrenlandiyaya 200 milyon avroluq yeni investisiya paketi ayırıb. Avropa Komissiyasının açıqlamasına görə, vəsait 2026–2027-ci illərdə kritik xammallar, enerji, rəqəmsal və peyk bağlantısı, balıqçılıq, təhsil, mənzil və davamlı turizm kimi sahələrə yönəldiləcək.
