“Anthropic”in Claude Fable 5.1 modelinin şotland yazıçısı Tomas Urkharta aid əsrlərdir açılmamış “Cyphral Distich” şifrəsini 44 dəqiqəyə həll etdiyi barədə iddia müstəqil yoxlamadan sonra ciddi suallarla üzləşib.
MS-News.az xəbər verir ki, ilkin məlumatı süni intellekt modellərini qiymətləndirən Vals AI yayıb və modelin 176 min token istifadə edərək, insan müdaxiləsi olmadan nəticəyə çatdığını bildirib.
“Cyphral Distich” hər birində 32 ədəd olmaqla iki sətirdən və ümumilikdə 64 rəqəmdən ibarətdir. “Vals AI”-nin təqdim etdiyi həllə görə, hər rəqəm Urkhartın 32 “Proquiritation” bölməsindən müvafiq birindəki sözün sıra nömrəsini göstərir, seçilmiş sözlərin ilk hərfləri isə “O GOD UPHOLD KING CHARLS THE SECOND AND / MAKE HIM THE SUPREME RULER OF THIS LAND” — təxminən “Ey Tanrı, Kral II Çarlzı qoru və onu bu torpağın ali hökmdarı et” mətnini yaradır.
Lakin bu nəticə qısa müddət sonra mübahisələndirilib. “Reticuli Labs” tərəfindən aparılan və “The Colony” platformasında yayımlanan müstəqil yoxlamada Britaniya Kitabxanasının 1653-cü il “Logopandecteision” nüsxəsinin son səhifələri araşdırılıb. Tədqiqatçılar “Vals AI”-nin iddia etdiyi kimi 32 “Proquiritation” bölməsindən dərhal sonra iki sətirlik rəqəm şifrəsinin olmadığını bildiriblər.
Daha ciddi problem isə təklif olunan deşifrə üsulunun orijinal mətn üzərində tam işləməməsidir. Müstəqil yoxlamaya görə, alınmalı olan 64 hərfdən ən azı 10 mövqedə tələb olunan hərflə başlayan heç bir söz müvafiq bölmədə mövcud deyil. Məsələn, “KING” sözündəki “K” hərfinin alınmalı olduğu 11-ci bölmədə “K” ilə başlayan söz olmadığı göstərilib. Müxtəlif indeksləmə və tokenləşdirmə üsullarının sınağı da elan olunan nəticəni təkrarlaya bilməyib.
“Alimlər 1653-cü ildən bəri 373 il bu şifri açmağa çalışıblar” ifadəsi də dəqiqləşdirilməlidir. Tarixi mənbələr şifrənin ən azı 1899-cu ildə “Notes and Queries” jurnalında açıq problem kimi təqdim edildiyini göstərir. Kriptoqrafiya tədqiqatçısı Klaus Şmehin araşdırmasına görə, şifrənin Urkhartın orijinal 1653-cü il kitabında məhz hansı formada yerləşdiyi də tam aydın deyil; məlum nüsxələrdən biri 1899-cu ildə Con Uillkokun Urkhart haqqında əsərində dərc olunub.
Qazaxıstanın “El.kz” nəşri də iddianı işıqlandırarkən nəticənin dərhal mübahisələndirildiyini və orijinal mənbə üzərində təkrar edilə bilmədiyini qeyd edib. Buna görə hazırkı mərhələdə “Claude Fable 5.1”-in “373 illik şifri həll etdiyi”ni təsdiqlənmiş elmi və ya kriptoqrafik fakt kimi təqdim etmək düzgün deyil.
“Claude Fable 5.1” isə real olaraq “Anthropic” tərəfindən sentyabrın 1-də təqdim edilmiş yeni modeldir. Şirkətin rəsmi sənədlərinə görə, model uzunmüddətli agent tapşırıqları, proqramlaşdırma və çoxmərhələli araşdırmalar üçün nəzərdə tutulub. Lakin “Cyphral Distich” üzrə nəticənin etibarlılığı hazırda ayrıca mübahisə mövzusudur.
