ABŞ maliyyə naziri Skott Bessent Ukraynanın Rusiya enerji obyektləri və neft emalı müəssisələrinə hücumlarının qlobal enerji qiymətlərinin yüksəlməsinə təsir göstərdiyini bildirib.
MS-News.az xəbər verir ki, Bessent sentyabrın 2-də “Fox News” telekanalının “Fox & Friends” proqramında hazırkı enerji şokunun həm Ukrayna müharibəsi, həm də İran ətrafındakı hərbi qarşıdurma ilə əlaqəli olduğunu deyib.
“Ukrayna Rusiyanın enerji aktivlərini və neft məhsulları istehsalını vurmaq qərarına gəlib”, – Bessent bildirib. Onun sözlərinə görə, bu hücumlar dünya bazarında enerji qiymətlərinə əlavə yüksəliş təzyiqi yaradır. ABŞ maliyyə naziri ikinci əsas amil kimi İranla münaqişəni göstərib və həmin qarşıdurmanın son nəticədə başa çatacağını söyləyib.
Ukrayna son aylarda Rusiyanın neft emalı zavodlarına və digər enerji obyektlərinə uzaqmənzilli PUA zərbələrini intensivləşdirib. Kiyev bu kampaniyanı Moskvanın müharibəni maliyyələşdirən enerji gəlirlərini və hərbi-logistika imkanlarını zəiflətmək məqsədi ilə əsaslandırır. “Reuters” avqustun sonunda hücumların Rusiyanın benzin istehsalını daxili tələbatın təxminən 70 faizinə qədər azaltdığını yazıb.
Enerji bazarındakı hazırkı gərginliyin daha böyük hissəsi isə Yaxın Şərqdəki vəziyyətlə də əlaqələndirilir. “Reuters”-in məlumatına görə, ABŞ və İran arasında yenidən başlayan hərbi zərbələrdən sonra sentyabrın 1-də Brent markalı neft 4,6 faiz bahalaşaraq 94,65 dollara, WTI isə 5,2 faiz yüksələrək 90,22 dollara çatıb. Sentyabrın 3-də Brent qiyməti 95 dolları keçib.
Eyni zamanda, Rusiya neft emalı zavodlarına zərbələr qlobal emal olunmuş yanacaq bazarında da təzyiq yaradıb. “Reuters” sentyabrın 2-də Avropada benzin emalı marjasının bir barel üçün 62 dolları keçdiyini və buna həm Yaxın Şərqdəki, həm də Ukraynadakı münaqişələrin yanacaq təchizatını məhdudlaşdırmasının təsir etdiyini bildirib.
